Роберто Карлос Америка кубоги финалида қандай ҳисоб қайд этилишини тахмин қилди

Бразилия ва Аргентина терма жамоалари ўртасидаги Америка кубогининг финал учрашуви 11 июль куни Рио-де-Жанейро шаҳридаги "Маракана" стадионида бўлиб ўтади.

"Биз ўз уйимизда ўйнаяпмиз, жамоа яхши ҳаракат қилмоқда, шунинг учун биз ғалаба қозонишимиз мумкин деб ўйлайман. Ўйин осон бўлмайди, аммо Бразилия 2:0 ҳисобида ғалаба қозониши мумкин", — дейди Бразилия таркибида 125 учрашувда 11 та гол урган футболчи.

Бразилия термаси нега 19 йилдан буён жаҳон чемпионатида ғалаба қозона олмаётгани ҳақида Карлос шундай деди: 

"Бир неча авлодлар алмашинуви бўлди, бу ўзгариш жаҳон чемпионатларида ўйнаган юқори савияли футболчилар Америка кубоги, Конфедерациялар кубоги каби барча совринларни қўлга киритиб, ўз фаолиятини якунлагандан сўнг содир бўлди. 

Ҳозирги таркибнинг биз эришган ютуқларга эришиши қийин. Биз бу жамоада кўпроқ бирдамлик, ўзига ишонч пайдо бўлиб, ЖЧда ғалаба қозониши учун сабр-тоқатли бўлишимиз керак. Америка кубоги деярли қўлимизда. Бразилия терма жамоаси амалдаги чемпион ва яна финалга чиқди. Аммо жаҳон чемпионатида ғолиб бўлиш жуда қийин", — дея таъкидлади собиқ чап қанот ҳимоячиси.

Шу билан бирга, Карлоснинг фикрига кўра, ҳозирги бразилияликлар ушбу таркибда ўйнаган тақдирда, Европа чемпионати финалига қадар етиб бориши мумкин эди. Ушбу чемпионатнинг финали якшанба куни Лондондаги "Уэмбли" стадионида бўлиб ўтади ва олтин медаллар тақдирини Англия ва Италия жамоалари ўртасидаги баҳс ҳал қилади.

"Бразилия терма жамоаси албатта финалда ўйнаган бўларди. Ушбу босқичда Бразилия–Англия ёки Бразилия–Италия тўқнаш келарди. Бразилияликлар юқори даражадаги турнирларда ўйнашга одатланиб қолган. Улар ҳар доим ҳам ғалаба қозонмайди, аммо терма жамоада бешта юлдуз бор, биз жаҳон чемпионатларида беш марта ғолиб чиққан ягона терма жамоамиз", — деди Роберто Карлос.