Равшан Муқимов: "Динамо" характер кўрсата олди"

Дастлаб йиғилганлар саволларига "Локомотив" мураббийи Равшан Муқимов жавоб қайтарди.

"Бу футбол ва ўйин шунга муносиб бўлди. Ҳар икки жамоага ҳам очколар жуда зарур эди. "Локомотив" чемпионлик учун курашаётган бўлса, "Динамо" охирги поғоналардан қочишга ҳаракат қилмоқда. Шундай ўйин бўлишини кутаётган эдик ва мана икки ўйиндирки бизга омад  келмаяпти. Вазиятларни яримидан ҳам фойдалана олмадик. Уларда битта вазият бўлди ва гол уришди, шунинг учун бу футбол. “Динамо”ни ғалаба билан табриклайман" - дея ўйин ҳақида фикрларини билдириб ўтди Равшан Муқимов.

- Учрашувдан сўнг мураббийлар видеомарказда ўйин видеосини қайтадан муҳокама қилиб чиқишди. Қандайдир эътирозлар бор эдими?
- Ҳеч қандай эътироз йўқ буни фақатгина ўзимиз учун кўрдик. Ҳакамлар яхши бошқариб боришди.

- Фарҳод Тожиев бу йил майдонга туша оладими?
- Йўқ, афсуски бу йилги мавсумда майдонга тушмайди. Аҳволи жуда жиддий ва кечагина Германиядан қайтиб келди.

- Учрашув олдидан "Динамо"ни қандай ҳисобда мағлуб этамиз деб ўйлаган эдинглар?
- Бугун фақат ютамиз деб келгандик. Бугунги учрашувда характер биринчи ўринга чиқди. "Динамо" ҳақиқий характер кўрсата олди.  Тажриба эса ғалабага етарли бўлмади. Дарвозабонни алоҳида таъкидлаган бўлар эдим. Мельничук учта яққол голдан жамоасини сақлаб қолди.

- Чемпионлик учун курашаётган "Локомотив" кетма-кет мағлубиятга учрамоқда. Жамоани чемпионликка ҳаракатини қандай баҳолар эдингиз?
- Ҳали олдинда олтита тур бор ва кураш энди бошланди. Кўраяпсизлар ҳар турда  катта сенсациялар бўлмоқда. Қолган турлар кескин ўтишига шубҳаланмасак ҳам бўлади.

- Жамоанинг ўйинида пасайиш кўргандек бўлдик. Бу нима билан боғлиқ ёки рақибни менсимасликмиди бу?
- Жамоамизга шиддат етишмади. Ўйиндан олдин йигитлар ютамиз деган эди ва жазоланди. Психология жиҳатидан яна қайта ишлаймиз.


Ҳумоюн Давуров ёзиб олди.