Равшан Ҳайдаров: "Осиё чемпионатидаги ҳар бир рақиб жамоа тўғрисида етарлича маълумот тўпладик"

Мьянмага учиб кетиш олдидан Равшан Ҳайдаров тайёргарлик ҳақида қисқача ўз фикрларини билдирди.

- Мана, Тошкентдаги охирги йиғинни ҳам якунладик. Унда футболчиларнинг ҳолати ҳақида зарур маълумотга эга бўлдик. Жамоавий ўйинни шакллантиришга катта эътибор қаратдик. Бу ёғига бизни расмий ўйинлар кутиб турибди. Шу сабабли ҳар бир кундан унумли фойдаланишга ҳаракат қилдик. Бугунги назорат баҳси тегишли хулосалар чиқаришга янада катта ёрдам беради.

- Рақибларни ўрганиш қандай кечди?
- Ҳар бир рақиб жамоа тўғрисида етарлича маълумот тўпладик. Индонезия, БАА ва Австралияни диққат билан ўргандик. Биринчи турдаги рақибимиз Индонезия йиғинни Испанияда ўтказганидан хабаримиз бор. Улар “Реал”, ”Барселона” ва “Валенсия” сингари клубларга қарши ўйинларда майдонга тушишди. БАА ҳам Японияда шуғулланди.

- Жамоа олдига қандай вазифа қўйилган?
- Чиройли ўйин кўрсатган ҳолда жаҳон чемпионатига йўлланмани қўлга киритишимиз керак.

- Жамшид Болтабоевнинг ҳолати қандай?
- Унда кичик жароҳат бор. Менимча, Жамшид бизга иккинчи турдан бошлаб ёрдам беради. Дастлабки ўйингача тўлиқ тикланиб улгурмайди. Бир учрашувни ўтказиб юборса ҳам тўлиқ тикланиб олса кифоя.

Умид қиламизки, Равшан Ҳайдаров қўл остидаги терма жамоа бизни кичик мундиал йўлланмаси билан хушнуд этади.


Беҳзод НАЗАРОВ.