Қозоғистонлик журналист: "Қозоғистон терма жамоаси Ўзбекистонга ютқазиб қўйишдан қўрққани учун ўйинни бекор қилди"

Бу ҳақда Алишер Никимбаев телеграмдаги ўз каналида маълум қилди.

"Бизда Ўзбекистон ва Қозоғистон терма жамоалари ўртасидаги ўртоқлик учрашувининг нима учун бекор қилингани ҳақида бошқа версия бор. Мен олган маълумотларга кўра бу Қозоғистон бош мураббийнинг истаги билан бўлмаган. Ахир Ўзбекистон билан баҳс бекор бўлгач унинг ўрнига Арманистон танланганди. Бу жамоани Ўзбекистондан кучлироқ деб бўлмайди. Гап шундаки, Қозоғистон футбол федерацияси президенти сўнгги пайтларда мамлакатда ўз обрўсини бироз йўқотиб қўйганди ва шундай пайтда принципиал рақибга ютқазиш жуда ёмон бўларди, юқоридагилар буни кечирмасликлари мумкин эди. Ўйин бекор қилинишининг сабаби, бизникилар таваккал қилишни истамаганликларида", - деб ёзади журналист.

Эслатиб ўтамиз, режага кўра 26 март куни Тошкентда қўшни давлат жамоалар ўртасидаги халқаро ўртоқлик учрашуви бўлиб ўтиши лозим эди. Бироқ ўтган йил декабрь ойида баҳс бекор қилинган эди.