ПРО-Лига, “А” гуруҳи. 1-турда энг кўп мухлис Андижонда

Кеча “Шўртан” – “Хоразм” ўйини турга якун ясаб берди.

Янгича форматда ташкил этилган мусобақада жамоалар 9тадан икки гуруҳга ажратилган холда, ғолиблик учун кураш олиб бормоқда. Очиғини айтганда, қизиқарли кечиши кутилаётган ушбу мусобақанинг илк тур ўйинига ишқибозларнинг ташрифи юқори бўлишини кутгандик. Аммо тан олиш керак, бу йил ҳам ПРО-Лига ўйинларига мухлислар томонидан бўлган қизиқиш у қадар юқори бўлмаяпти. Буни биринчи турда стадионга томошабинларнинг ташрифидан ҳам билиб олиш мумкин. Рақамлар барчасини айтиб турибди.

“А” гуруҳида 4та ўйинга жами 10 217 нафар ишқибоз ташриф буюрган. Ҳар бир учрашувга ўртача 2 554 та мухлис демакдир.

Ўйинлар қайдномасига назар ташлайдиган бўлсак, энг кам мухлис Ғузорда кечган “Шўртан” – “Хоразм” баҳсида кузатилганини кўриш мумкин. Афтидан Ғузорда ишқибозлар катта футболдан бехабар қолиб кетган ёхуд ҳақиқатдан ҳам уларнинг футболга бўлган қизиқиши пасайган дейиш мумкин.

Қорақалпоғистонда ҳам футболга қизиқиш йўқдек. Негаки, “Истиқлол”дек рақибга қарши баҳсда Нукусдаги “Турон” стадионида атига 1280 нафар томошабин қадам ранжида қилган.
Аксинча энг кўп мухлис Андижондаги “Соғлом авлод” стадионига кирган. Турнинг марказий ўйини “Андижон” – “Машъал” учрашувига 4560 нафар ишқибоз киргани, қайдномада кўрсатиб ўтилган.    

Томошабинлар ташрифи кимда қандай?

“ОРОЛ” – “ИСТИҚЛОЛ” – 1:2 
Нукус шаҳри. “Турон” стадиони. 1280 томошабин.

“АНДИЖОН” – “МАШЪАЛ” – 2:0 
Андижон шаҳри. “Соғлом авлод” стадиони. 4560 томошабин.

“НОРИН” – “ДИНАМО” – 0:0.
Ҳақулобод шаҳри. “Шодлик” стадиони. 3126 томошабин.

“ШЎРТАН” – “ХОРАЗМ” – 5:1 
Ғузор шаҳри. “Ғузор” стадиони. 1251 томошабин.

ПРО-Лига, “А” гуруҳи. 1-турда энг кўп мухлис Андижонда