Превью. Милан дербиси ва 23-турнинг бошқа учрашувлари ҳақида

"Ювентус" ҳамон етакчилик қилишда давом этмоқда. Кейинги ўринни Турин клубидан уч очко фарқ билан "Интер" эгаллаб турибди. Римнинг "Лацио" клуби иккинчи поғонага чиқиб олиш учун ҳаракат қиляпти, аммо ўтган тур "Верона"га қарши баҳсда (0:0) ҳисоб очилмади. Натижада "бургутлар" 1 очко билан учинчи поғонани банд этиб туришибди.

Ўтган тур "Рома" ҳамда "Аталанта" кутилмаган натижани қайд этди: римликлар "Сассуоло"га 2:4 ҳисоб билан мағлуб бўлишди, бергамоликлар эса "Женоа" устидан ғалабага эришолмадилар (2:2). Лекин "Аталанта" бир очко туфайли тўртинчи ўринга кўтарилиб олди, "Рома" эса бешинчи поғонада бормоқда.

Турнир жадвалининг қуйи ўринларида жиддий ўзгаришлар йўқ, СПАЛ 20-поғонани, 19-ўринни эса навбатдаги мағлубиятдан сўнг бош мураббийини истеъфога чиқарган "Брешиа" эгаллаб турибди.  17-поғонани эса ўйин натижалари ижобий томонга бироз ўзгарган "Женоа" банд этди.

Турнинг энг муҳим воқеалари

"Брешиа" иккинчи маротаба Коринини истеъфога чиқарди, "Торино" эса Вальтер Мадзарри билан хайрлашди

"Брешиа" мавсумда иккинчи бор Эудженио Коринини лавозимидан озод этди. Италиялик мутахассис бу сафар ҳам унга билдирилган ишончни оқлай олмади, кетишига эса яна бир қатор муваффақиятсиз натижалар сабаб бўлди. "Қалдирғочлар" италияликнинг иккинчи бор мураббийлик рулига ўтирган вақтдан бошлаб, 9та ўйинда атиги 8 очко тўплашга муваффақ бўлдилар ва элитадан чиқиб кетишлари мумкин бўлиб турибди.

"Брешиа"нинг янги мураббийи этиб Диего Лопес тайинланди. Уругвайлик мураббийнинг бундан аввалги иш жойи "Пеньяроль" клубида бўлганди. Лопес ушбу жамоа билан Уругвай чемпиони бўлган. Мутахассиснинг Италия чемпионатида бироз тажрибаси ҳам бор: "Кальяри" тизимида 4 мавсум ишлаган. Аввалига ёшлар билан фаолият юритган, кейин эса сардинияликларга бошчилик қилган. Шунингдек, "Болонья" ва "Палермо"да ҳам ишлашга улгурган.

Яна бир шов-шувли истеъфолардан бири Туринда содир бўлди. Навбатдаги йирик ҳисобдаги мағлубиятдан сўнг, "Торино" бош мураббийлик лавозимидан Вальтер Маццаррини озод этди. Сабаби ўтган ҳафта жамоаси "Лечче"га 0:4 ҳисобда мағлуб бўлганди. Клуб президенти бирданига уни истеъфога чиқариши кўпчилик учун кутилмаган хабар бўлди, ахир Маццарри "буқалар" билан озмунча ютуқларга эришганмиди?! (сўнгги 7 йил ичида ғалабалар фоизи бўйича энг яхши мураббийга айланганди).

Бироқ мавсум бошида ҳеч ким воқеалар ривожи бундай тус олишини кутмаганди. "Торино" Европа Лигаси саралаш босқичини ўзига ишонч билан бошлади. Лекин "Вулверхэмптон"га ғалабани бой бериб, кейинги босқичга чиқа олмади. Мамлакат чемпионатида ҳам ишончли ўйин кўрсатадигандек эди, бироқ сўнгги уч тур ичида 13та гол ўтказиб юборди, камига биттагина гол уришга муваффақ бўлди. Бу эса тажрибали италиялик мутахассис обрўсига салбий таъсир кўрсатди.

Ҳозирги мураббийни кўриб, кўпчилик ажабланиши мумкин: жамоа рулига Морено Лонго ўтирди. У "Фрозиноне"даги фаолияти билан кўпчиликка таниш — ўтган мавсум 16 тур давомида Италияда ишлаган. Моренони Туринда ҳам яхши билишади. Оммавий ахборот воситаларидаги у ҳақидаги турли хил маълумотларга қарамай, "буқалар" мухлислари уни илиқ кутиб олишди. Ахир италиялик бир пайтлар "Торино" сафида тўп тепган ҳамда 11 йилдан бери Италия футбол тизимида фаолият юритади. Хўш, нима бўлганда ҳам, "Торино" нималарга эришишини олдиндан айтиш қийин. Бироқ эртага "Сампдория"га қарши ўтадиган баҳс қизиқарли ва кутилмаган воқеаларга бой бўлса ажабмас.

Лацио иккинчи ўринга чиқиб олиш имкониятини қўлдан бой берди

Ўтган ҳафта "Лацио" Римда "Верона"га қарши қолдирилган баҳсни ўтказди. Бу ўйин "бургутлар" "Интер"дан ўзиб кетиши ва иккинчи ўринга чиқиб олиши учун яхшигина имконият эди. Бироқ римликлар бундан унумли фойдалана олмадилар, чунки рақиб дарвозасига йўл тополмадилар. Ҳозирча жамоа Милан клубидан бир очко, Турин клубидан эса тўрт очко ортда қолмоқда.

Бир қатор ғалабали натижалар қайд этиш учун римликларга захира ўриндиғининг қисқалиги ҳалақит қилди: дам олишсиз майдонга тушаётган етакчиларни алмаштириш керак. Рим клуби қишки трансфер ойнасида ҳужумчи Оливье Жируни сотиб олишга ҳаракат қилди, лекин кўриб турганингиздек... Бир муаммо кетидан яна бошқа муаммо келиб чиқмоқда. Бу қийинчиликларни "Ювентус" ва "Интер" ўртасида олтин медаллар учун курашнинг ҳал қилувчи қисми десак муболаға бўлмайди. Аммо... Аммо ушбу мавсумдаги энг муҳим вазифа Скудеттога эга чиқиш эмас, балки узоқ кутилган Чемпионлар Лигаси йўлланмасини қўлга киритишдир.

Женоа қуйи дивизионга тушиб кетмаслик учун бор кучи билан ҳаракат қилмоқда

Генуя клубидаги вазият раҳбариятни трансфер бозоридан олиб чиқишдир. "Грифонлар" турли позиция ўйинчилари билан шартнома имзоладилар. Улар орасида голкипер Маттиа Перинни қайтганини алоҳида таъкидлаб ўтиш лозим. Ҳимоячилар Андреа Масьелло ("Аталанта") ва Адам Сумаоро ("Лилль"), ҳужум чизиғи ўйинчилари — Маттиа Дестро ("Болонья"), Яго Фальке ("Торино") ва Валон Бехрами (эркин агент). Бу трансферлар жамоа ҳимоясини мустаҳкамлаш ҳамда ҳужумдаги натижаларни яхшилашга ёрдам бериши лозим.

"Женоа" сўнгги икки ўйинда яхши ўйин намойиш этди, "грифонлар" Флоренцияда уч очко олиб қайтишга яқин эдилар, аммо баҳсда ҳисоб очилмади. Ўтган ҳафта эса "Аталанта" билан ҳам дуранг натижа қайд этилди (2:2). "Кальяри"га қарши кечадиган баҳсда жамоа 4та ўйиндан буён давом этаётган ғалабасиз серияга барҳам бериши ва 17-ўринга чиқиб олиши кутилмоқда.

Марказий учрашув: "Интер" — "Милан"

Делла Мадоннина дербиси. Ҳар икки жамоа ушбу беллашувга нисбатан яхши спорт формасида, натижа ва барқарор ўйин кўрсатиб етиб келишмоқда. 

"Интер" қатор дуранглардан кейин "Удинезе"ни мағлуб этди (2:0). Конте жамоаси ҳамон "Ювентус"дан ортда қолмоқда ва қувишда давом этяпти. Бўлажак ўйиндан аввал "Интер"да бир нечта муҳим футболчиларнинг майдонга туша олмаслиги муаммоси бор. Ҳимоячи Алессандро Бастони ва ҳужумчи Лаутаро Мартинес дисквалификация туфайли жамоага ёрдам бера олмайди. Бундан ташқари, бармоғини синдириб олган дарвозабон Самир Хандановичнинг ҳам бу беллашувда қатнашиши сўроқ остида. 

"Милан" ҳамон мағлуб бўлмаяпти. Ўтган турда "Верона" билан дуранг қайд этилди (1:1) ва 8-ўринга кўтарилди. Қишки танаффусдан кейин Стефано Пиоли шогирдлари уч бор ғалаба қозонди ва икки марта дурангга имзо чекди ҳамда Кубок ярим финалига чиқди. Навбатдаги ўйинга "Милан" жиддий йўқотишларсиз етиб келди. Златан Ибрагимович ва Симон Кьяер соғайиб сафга қайтди ва ўйин қайдномасига киритилди. 

Бу Антонио Конте учун "нерадзурри" устози ва номинал мезбон сифатида илк Делла Мадоннина дербиси. Аввалги учрашувлар натижаларига эътибор қаратадиган бўлсак, мутахассис мураббий сифатида "Милан"га ҳеч қачон мағлуб бўлмаган: 7 ғалаба ва 3 дуранг.

А Серия учрашувлари бошланиш вақти

7 февраль
00:45 Рома - Болонья

8 февраль
19:00 Фиорентина - Аталанта
22:00 Торино - Сампдория
00:45 Верона - Ювентус

9 февраль
16:30 СПАЛ - Сассуоло
19:00 Брешиа - Удинезе
19:00 Женоа - Кальяри
19:00 Наполи - Лечче
22:00 Парма - Лацио
00:45 Интер - Милан