Португалия терма жамоаси дарвозабони: "Мақсадимиз мусобақанинг сўнгги кунига қадар шу ерда қолиш"

- Португалия терма жамоаси мундиалга қандай тайёргарлик кўрди? Панамага қарши кечадиган дастлабки учрашувга қанчалик тайёрсизлар?

- Биз Панама терма жамоасининг бир нечта ўйинларини таҳлил қилиб чиқдик ва видеоларни кўрдик. Қийин ўйин бўлишини тахмин қиляпман, сабаби Панама жисмоний ҳолати анча кучли ва қарши ҳужумда жуда хавфли. Биз анча эътиборли ва ҳушёр бўлишимиз керак. Панама терма жамоаси бизга етарлича муаммо туғдира олишига ишонаман, аммо биз якунда ғалабани қўлга киритишимиз керак. 

- Гуруҳдаги рақиблар ҳақида фикр билдириб ўтсангиз? Марокаш, Тожикистон ва Панама терма жамоалари билан бир гуруҳдан жой олгансизлар...

- Кўпчилик бу терма жамоаларни жиддий қабул қилмаслиги мумкин, аммо футзални мунтазам кузатиб борадиган инсонлар бундай фикрламаслиги аниқ. Марокаш сўнгги йилларда яхшигина ўсишга эришди. Тожикистон эса Осиё Кубогида "сюрприз" жамоа бўла олди. Тожикистон футзалчилари юқори даражали ўйинчилар ва улар ўз ишини жуда яхши бажаришмоқда. Панама терма жамоаси эса "Конкакаф" минтақаси чемпиони. Барча рақибларга қарши осон ўйин бўлмаслиги аниқ.

- Амалдаги Жаҳон чемпионларининг ушбу мундиалдаги мақсадлари қандай?

- Аввалроқ айтиб ўтганимдек, биз ўз минтақасининг чемпионлари билан бир гуруҳдан жой олганмиз. Бош мураббийимиз айтиб ўтганидек, бизнинг асосий мақсадимиз мусобақанинг сўнгги кунига қадар шу ерда қолиш. Биз қийин гуруҳдан жой олдик, аммо кейинги босқичда яхшироқ вазиятда бўлишимиз учун гуруҳда биринчи ўринни эгаллашимиз керак. 

Абдулвосит Бектемиров суҳбатлашди

Эслатиб ўтамиз, Португалия футзал терма жамоаси мундиалдаги юришини 16 сентябрь куни Панамага қарши бошлайди. Учрашув соат 17:30да "Ҳумо Арена"да ўтказилади.