ПФЛ эртанги финал нима учун текин эканига изоҳ берди

Фарғонадаги финал ўйинига кириш бепул деб эълон қилинди. ПФЛ нима учун чипталар бепул эканилигига тушунтириш берди.

"Финал олдидан мухлислар учун таниқли хонандалар иштирокида концерт дастурлари ўтказилади. Улар иштирокидаги куй-қўшиқлар “Истиқлол” стадионига ташриф буюрадиган мухлисларнинг кайфиятини янада кўтаришга хизмат қилиши шубҳасиз.

Финал ўйини давомида мухлисларга қулайлик яратиш мақсадида, “Истиқлол” стадионида турли егулик ва ичимликлар савдоси ташкил этилади.  Футбол мухлислари ҳақиқий футбол байрамидан баҳра олишлари учун барча чора-тадбирлар амалга оширилмоқда.

Ушбу финал учрашувининг барча харажатлари ПФЛ ҳамда ПФЛнинг ҳомий ва ҳамкорлари томонидан қопланмоқда.  Шу сабабли ҳам финал учрашуви чипталари мухлислар учун бепул қилиб белгиланди. Бундан кўзланган асосий мақсад стадионга кўпроқ мухлисларнинг ташриф буюришини, байрамдан барча бирдек баҳраманд бўлишини таъминлашдан иборат", - деб ёзилади ПФЛ расмий сайтида.