Пенальти қайтарган Макосин, дубль қайд этган Ғофуров, "аждарлар"ни сезмаган Муҳаммаданас ва "Пахтакор"ни ютган Крестинин — Суперлигада 26-тур лауреатлари

"Championat.asia" ўтказилган баҳслар асосида тур лауреатларини аниқлади.

"Қизилқум" кипери Артем Макосин "Championat.asia" сайти талқинига кўра 26-турнинг энг яхши дарвозабони деб топилди.  

Навоийликлар дарвозабони ортда қолган тур баҳсида кўп марта сэйв намойиш қилди ва баҳс охирида пенальтини қайтаришга эришди. Қисқа қилиб айтган тажрибали посбон "Турон" устидан қозонилган ғалаба (1:0)га муносиб ҳисса қўшди. 

"Металлург" ярим ҳимоячиси Ҳусниддин Ғофуров "Championat.asia" талқинида 26-турнинг энг яхши футболчиси дея эълон қилинди.   

"Олимпик"ка қарши беллашувда фаоллиги билан ажралиб турган Ғофуров 10 ва 64-дақиқаларда гол уриб дубль қайд этди. Айнан унинг голлари жамоасига ғалаба келтирди ва бекободликлар мавсумни ТОП-10да якунлашини таъминлади. 

ОКМК футболчиси Муҳаммаданас Ҳасановнинг "Насаф" дарвозасига киритган тўпи "Championat.asia" талқинига кўра 26-турнинг чиройли голи (ВИДЕО) деб тан олинди.

Охирги турнинг икки баҳси марказий номига лойиқ эди ва бири иккинчисидан қолишмасди. Олмалиқда ОКМК медаллар учун курашда "Насаф" билан куч синашди. 

Мезбонлар таркибида Муҳаммаданас Ҳасанов анча фаол ҳаракат қилди ва бир неча бор дарвоза томон зарба йўллаб, охири ниятига етди. Айнан Ҳасановнинг зарбасидан кейин Абдувоҳид Неъматов тўпни қайтара олмади. Бу эпизодда Муҳаммаданас ўнгроқдан индивидуал маҳорат эвазига бир нечта рақибларини ортда қолдирди ва жарима майдончасига ёриб кириб, аниқ зарба берди. Голни кўрмаган бўлсангиз, ВИДЕОсини албатта кўриб қўйинг.  

"Бунёдкор" бош мураббийи Александр Крестинин "Championat.asia" талқинига кўра 26-турнинг энг яхши мураббийи сифатида эътироф этилди. Ушбу мураббий бошчилигидаги "қалдирғочлар" сўнгги учрашувда ғалаба қозонишди ва "Бунёдкор" мавсумни юқори нотада якунлай олди. 

"Қалдирғочлар" сафарда амалдаги чемпион дарвозасига 3 бор йўл топа олишди ва ғалабани тантана этишди.