"Пахтакор" ва "Локомотив"нинг янги бош мураббийлари, Машариповнинг трансфери. Янги ҳафтада бизни қандай расмий хабарлар кутмоқда?

Янги ҳафтадан барча яна ишга қайтади ва расмий хабарлар чиқа бошлайди.

Катта эҳтимол билан кейинги ҳафтада "Пахтакор" клубининг янги бош мураббийи номи эълон қилинади. Шота Арвеладзенинг 31 декабргача шартномаси бор эди, у расман ниҳоясига етди. Ҳозиргача клуб расмий сайти Арвеладзе жамоани тарк этди деб хабар бергани йўқ. Агар қандайдир мўъжиза туфайли грузиялик мураббий ортга қайтмаса унинг ўрнига бошқа мутахассис тайинланади ва бу ҳақда клуб матбуот хизмати хабар беради. Championat.asia сайтида Арвеладзенинг ўрнига бошқа грузиялик мураббий номзоди кўриб чиқилганини маълум қилганди. Янги мураббий тайинлангач унинг ортидан трансферлар ҳам эълон қилина бошланади.

"Локомотив" ҳам янги ҳафтада ўзининг янги бош мураббийини расман эълон қилади. Янги мураббий билан 2 йиллик шартнома тузилганини клуб бош директори ўринбосари Тўлабек Акромов твиттердаги ўз саҳифасида ёзиб қолдирди. Championat.asia сайти эса янги мураббий португалиялик Микаэль Сикейра бўлиши мумкинлиги ҳақида ёзди. Бундан ташқари "Темирйўлчилар" аслида "Қўқон-1912"га тегишли бўлган "Пахтакор"да ижарада ўйнаган Жавоҳир Сидиқов билан келишиб олишганини маълум қилди.

Барча кутаётган яна бир расмий хабар бу Жалолиддин Машариповнинг трансфери. Ўзбекистон терма жамоаси ва "Пахтакор" клуби ярим ҳимоячиси айни пайтда БААда оиласи билан хордиқ чиқармоқда. Янги йил байрамидан олдин футболчи Дубайда Саудия Арабистонининг "Ал Насср" клуби учун тиббий кўрикдан муваффақиятли ўтганини championat.asia сайти ёзганди. Саудия Арабистонида трансфер ойнаси 12 январь куни очилади. Яқин кунлар ичида Машариповнинг трансфери расман эълон қилинишини тахмин қилиш қийин эмас.