"Пахтакор" - "Қизилқум" ўйинидан олдин: Арвеладзе ва Актамовга доир қизиқарли факт ва рақамлар (статистика)

2017 йилнинг иккинчи қисмидан бошлаб "Пахтакор"ни ўз қўлига олган Шота Арвеладзе бугун жамоа бошқарувидаги 73-учрашувини ўтказади. Бунга қадар грузиялик мутахассис "Пахтакор" рулида барча мусобақаларда (Олий лига/Суперлига, Ўзбекистон Кубоги, ОЧЛ, Лига Кубоги) 72 ўйинда ишлашга улгурди. Арвеладзе "Пахтакор" бош мураббийи сифатида ҳозирга қадар 47 ғалаба, 13 дуранг ва 12 мағлубият қайд этган. Тўплар нисбати: 135-58.

Навоийнинг "Қизилқум" бош мураббийи сифатида ишлаб келаётган Ҳамиджон Актамов учун эса бугунги баҳс 114-ўйин (Олий лига/Суперлига, Ўзбекистон Кубоги, Лига Кубоги) бўлади.  Навоийликлар Актамов бошқарувида қуйидагича натижалар қайд этишган: 38 ғалаба, 31 дуранг ва 44 мағлубият. Тўплар нисбати: 136-157.

Қизиғи, Актамов бош мураббийлигида "Қизилқум" ўтказилган ўйинларда ғалабадан кўра кўпроқ мағлубиятга учраган. Яъни мағлубиятлар сони ғалабалардан кўп.

Яна бир қизиқ тарафи, Шота Арвеладзе "Пахтакор" рулида 72 ўйин ўтказганига қарамасдан, 2016 йилдан буён "Қизилқум"га расман бош мураббий этиб тайинланган Актамов жамоаси 113 учрашувда урган голлардан атига битта кам киритган.

Яъни, "Қизилқум" Актамов бошқарувида 113 баҳсда 136та гол урган бўлса, "Пахтакор" Арвеладзе қўл остида 72 учрашувда 135та гол киритишни уддалаган. Бугун мазкур кўрсаткич бўйича Арвеладзе буткул илгарилаб кетиш имкониятига эга.

Қизиқарли факт сифатида Ҳамиджон Актамов Шота Арвеладзедан Ўзбекистонда биринчи бўлиб очко олган мутахассис бўлганини эътироф этиш мумкин. Лекин ҳозиргача грузиялик мутахассис Актамов жамоасига ютқазмай келмоқда.

Яна бир эътиборга молик жиҳат шуки, сўнгги бор Олий лигада ишлаган ва ҳозирги Суперлигага ўзгартирилган чемпионат давомида истеъфога чиқарилмаган мураббийлар рўйхатида айнан Арвеладзе, Актамов ва "Насаф" устози Рўзиқул Бердиев қолганини айтиш мумкин. Суперлигада ишлаган қолган барча мутахассислар истеъфога чиқиб, жамоа ўзгартиришга улгуришди.