"Пахтакор": Футболчиларимиз позициялари бўйича етакчилар сафида

Жумладан, дарвозабон Александр Лобанов мавсум давомида 13 бор қуруқ ўйин ўтказиб, бу борада Мурод Зуҳуров билан энги яхши посбонларга айланишди. Лобанов 2 марта пенальтини қайтариб, "Сўғдиёна" вакили Михаил Спиридонов билан бир хил натижа қайд этди.

Ҳимоячи Аднан Ораховац мавсум давомида 3 гол уриб, ҳимоячилар орасида 3-натижа соҳибига айланди. 6 марта голли пас берган Аднан амплуадошлари ичида энг яхши натижага эришди. Гол+пас тизими бўйича 9 очко тўплаган Ораховац олий лига ҳимоячилари ўртасида етакчига айланди. Марказий ҳимояда ҳаракат қиладиган футболчи учун бу ажойиб натижа саналади.

Станислав Андреев ярим ҳимоячилар ичида 8та гол уриб, сермаҳсуллик бобида яхши натижани қўлга киритди. Яна 8 марта голли тўп оширишни уддалаган Стас олий лигадаги футболчилар ичида 3-кўрсаткични қайд этди. Шерзод Каримов ҳисобида ҳам шунча голли тўп ошириш мавжуд.

Игорь Сергеев эса 23 гол уришдан ташқари 3та голли пас берган. Гол+пас тизимида Сергеев мавсумнинг энг яхши футболчисига айланди. Андреев эса бу жиҳат бўйича Геворкян ва Ҳамдамов билан бирга 4-натижага эришди. Улар жами 16 балл жамғаришган.