Павел Врба: "Чех бўлмаганида ҳисоб йириклашиб кетарди"

- Катта турнирдаги биринчи ўйинимиздан кўнглим тўлди. Юқори савиядаги мусобақада яхши даражада ўйнай олдик. Тан олиш керак, Испания кучли ўйнади. Улар дарвозамиз олдида кўплаб вазиятлар содир этишди. Агарда Чех ва ҳимоядаги яхши ўйинимиз бўлмаганида таблодаги ҳисоб анча йириклашиб кетарди. Бизда гол уриш учун учта имконият юзага келганди. Ўйинни драматик қила олмаганимиздан бироз хафаман. Бошқа тарафдан олиб қараганда, футболчиларимиз қўлларидан келганича ҳаракат қилишди. Шунингдек, бугунги учрашувда бизни қўллаб-қувватлаб турган мухлисларимизга чин юракдан катта раҳмат айтмоқчиман. Бизга мухлислик учун Францияга жуда кўплаб ишқибозлар келганини кўриб қувондим. Улар бутун ўйин давомида тинимсиз олқишлаб туришди.