Павел Смоляченко: “Исмоиловнинг машғулотлари қизиқарли ўтмоқда”

Таркибда ўзгаришлар кузатилмоқда. Жамоанинг иқтидорли футболчиси Павел Смоляченко тайёргарлик ва таркибда рўй бераётган ўзгаришлар хусусида “СА”га интервью берди.

- Паша, жамоангиз Тошкентда йиғинни якунлаб, яна ўз қароргоҳига қайтиб келди. Аввало пойтахтда ўтган ўйинлар ва машғулотлар тўғрисида фикрларингизни билмоқчи эдик?
- Бўлажак мавсумга тайёргарлик юқори суратда ўтмоқда дейиш мумкин. Клубда бош мураббий алмаштирилгач, машғулотларда ҳам катта ўзгаришлар кузатилди. Чунки аввалги мураббий асосан жисмоний тайёргарлик устида иш олиб борарди. Мурод ака Исмоилов эса машғулот чоғида жисмоний тайёргарлик имкониятимизни ошириш учун тўп билан ишлаган холда, юкламалар бермоқда. Бу биз футболчиларга жуда қизиқарли ўтмоқда. Тошкентда бир нечта синов-назорат баҳсларида иштирок этдик. Афсуски ижобий натижалар бўлмади. Бу ўйинларда мураббий аралаш таркибни туширди. Чунки бу каби учрашувларда натижадан ҳам кўпроқ, янги ўйинчиларнинг қандай имкониятга эга эканлигини билиш биринчи ўринда туради. Муҳими чемпионатда ютқазмасак бўлгани.

- Таркибдаги келди-кетдилар ҳамон давом этмоқда. Нима деб ўйлайсиз янгилар “Нефтчи”ни кучайтира оладими?
- Менимча, ҳа. Чунки мураббий ёмон футболчини таклиф этмайди. Янги келиб қўшилганлардан Александр Оника ва туркманистонлик футболчи менда илиқ таассурот қолдирди. Айниқас Ониканинг тажрибаси катта эканлиги билиниб турибди. Бу футболчи Молдавия терма жамоасида ҳам бежизга ўйнамайди.

- Кетганларнинг ўрнини бу футболчилар муносиб равишда тўлдира олади деб ўйлайсизми?
- Йўқ, “Нефтчи” билан хайрлашган ўйинчиларни кучли деб ҳисоблайман. Балки янги келганлар улардан ҳам зўр ўйин намойиш этишар. Буни вақт кўрсатади. Барибир янги ўйинчига жамоага киришиб кетиши учун маълум бир вақт керак бўлади.

- Эртадан Фарғонада Ҳоким Кубоги турнири старт олади. Бу мусобақа жамоанинг мавсумга тайёргарлиги учун қанчалик фойдали бўлади?
- Ҳоким Кубоги турнири ҳар йили ўтказилиб келади. Афсуски бу йил “Андижон” ва “Навбаҳор” иккинчи таркиби билан келар экан. Бизнинг жамоа эса иккита таркиб билан ўйнайди. Ўйлайманки мусобақа ҳар бир жамоа учун фойдали бўлади. Чемпионат олдидан кўпроқ ўйин амалиёти зарур. Лекин Фарғонада ҳозир қор катта. Ҳайронман, қор қопланган майдонда ўйинлар қандай кечар экан...

Исломбек РУСТАМБЕКОВ суҳбатлашди.