ЎзПФЛ “Олимпик” бош мураббийи Тимур Кападзени расман огоҳлантирди. Бунга шортик сабаб бўлди
25 авг 2021 13:08
Новости

ЎзПФЛ “Олимпик” бош мураббийи Тимур Кападзени расман огоҳлантирди. Бунга шортик сабаб бўлди

“2021 йилги мавсумда Ўзбекистон Профессионал футбол лигаси томонидан ўтказиладиган мусобақалар регламенти”нинг 17.17-бандида жамоа бош мураббийи техник зонада шиппак, шорт ҳамда енгсиз футболкада бўлиши тақиқланиши кўрсатиб ўтилган.

Шунга қарамай, “Олимпик” бош мураббийи Тимур Кападзе Про лига 16-туридан ўрин олган “Арал самали” клубига қарши учрашув вақтида техник зонада шорт билан ҳаракат қилган.

Ўзбекистон Профессионал футбол лигаси бош мураббийлар техник зонада ўзлари учун қулай бўлган либосдан фойдаланишлари мумкин эканлигини эслатиб ўтади ва бунда Регламентда келтирилган бандларни ҳам ҳурмат қилишга чақиради. Шундан келиб чиқиб, Тимур Кападзе фаолият олиб бораётган клуб расман огоҳлантирилди. Мазкур ҳолат нафақат “Олимпик”, балки бошқа клуб бош мураббийи томонидан такрорланган тақдирда, ўша мутахассисга нисбатан жарима санкцияси қўлланилади.