Ўзбекистон U-23 юлдузлари ёшликда қандай бўлишган? ФОТО

Забиҳулло Ўринбоев. 1995 йил 30 март куни Тошкент шаҳрида таваллуд топган. Ўзбекистон Давлат Жисмоний тарбия институтини тамомлаган. Фаолиятини "Бунёдкор" клубида бошлаган. 2017 йилдан бери "Пахтакор" клуби аъзоси.

Забиҳулло терма жамоамиз сардори сифатида ҳар бир ўйинда жамоадошларини олдинга бошлашга, ўйин давомида уларнинг руҳиятини кўтаришга ҳаракат қилмоқда. Жанубий Кореяга қарши ўйинда дастлабки голни киритиб, мусобақадаги голлари сонини очишга муваффақ бўлди. Бугунги финал ўйинида ҳам Забиҳуллодан гол кутиб қоламиз.


Достонбек Ҳамдамов. 1996 йил 24 июль куни Тошкент вилоятида туғилган. Ўзбекистон Давлат Жисмоний тарбия институти талабаси. 2014 йилдан бери "Бунёдкор" футбол клубида тўп суриб келади. 2015 йил Осиёнинг энг яхши ёш футболчиси сифатида эътироф этилган.

Достонбек Ҳамдамов терма жамоамиз таркибида майдон марказини мустаҳкамлашда жуда катта ҳажмдаги ишни амалга оширмоқда. Рақибга прессинг уюштиришда ҳам жуда фаол. Японияга қарши кечган чорак финалда айнан прессинг эвазига ҳимоячини хато қилишга мажбур этиб, терма жамоамизнинг иккинчи голини киритишга муваффақ бўлганди.


Жавоҳир Сидиқов. 1996 йил 8 декабрь куни Тошкент шаҳрида туғилган. Ўзбекистон Давлат Жисмоний тарбия институти талабаси.   Фаолиятини “Пахтакор” клубида бошлаган. 2016 йилдан бери “Қўқон-1912” футбол клуби аъзоси.

Жавоҳир Сидиқов ушбу мусобақада терма жамоамизнинг ҳақиқий “жавоҳир” футболчиси бўлмоқда. Унинг ажойиб паслари рақиб ҳимоячиларини доғда қолдириб, терма жамоамиз футболчиларини дарвозабонлар билан бирга-бир вазиятга олиб чиқиб қўймоқда. Жанубий Кореяга қарши кечган ярим финалда айнан Сидиқовнинг пасидан кейин Забиҳулло Ўринбоев ҳисобни очишга муваффақ бўлганди.


Жасур Яхшибоев. 1996 йил 24 июнь куни Тошкент вилоятида туғилган.  Ўзбекистон Давлат Жисмоний тарбия институти талабаси.  2015 йилдан бери “Пахтакор” футбол клуби аъзоси.

Жасур Яхшибоев Хитойда бўлиб ўтаётган Осиё чемпионатининг кашфиётларидан бири бўлди. Ушбу футболчининг ўнг қанотдаги ҳужумкор ҳаракатлари, дриблинглари кўплаб мухлис ва мутахассисларнинг эътирофига сазовор бўлмоқда. Энг муҳими Жаур Яхшибоев жуда муҳим голлари билан терма жамоамизнинг ғалабасига ўз ҳиссасини қўшиб келяпти. У чорак финалда Япония дарвозасини икки марта ишғол қилиб, дублга эришди. Ярим финалда эса Жанубий Корея дарвозасига терма жамоамизнинг учинчи голини киритишга муваффақ бўлди. Бугун Жасурдан ҳам гол кутиб қоламиз.


Эслатиб ўтамиз, U-23 Осиё чемпионати финалидан ўрин олган Вьетнам – Ўзбекистон учрашуви Тошкент вақти билан соат 13:00да бошланади. Финал ўйинини "Спорт" телеканали жонли эфирда намойиш этади.