Ўзбекистон U-16 терма жамоасининг 7 нафар футболчиси изоляцияга олинди

Олинган маълумотларга кўра, терма жамоа аъзоларида иссиқ чиқиши кузатилган ва улар изоляцияга олинган. Бу борада батафсил маълумот олиш учун ЎФА терма жамоалар департаменти бошлиғи Азиз Ҳайдаровга мурожаат қилдик.

"Ўсмирлар терма жамоамизни етти нафар футболчисида коронавирус аломатлари сезилган. Лекин, ваҳимага хожат йўқ. Улар ўзларини яхши ҳис қилишмоқда. Айримларида истимаси чиққан. Барча зарур чора ва тадбирлар кўрилди.

Бир марталлик анжомлар, овқатлар етказиб беришни йўлга қўйдик. Ҳозирча уларни Чиғатой базасида карантинда сақламоқдамиз. Таваккал қилишни истамадик.

Ҳаттоки, баъзи бир футболчилар машғулотларга чиқиш истагини билдиришди. Аммо, катта таваккал қилгимиз келмади. Изоляцияга олинган, зарур дорилар етаказиб берилмоқда.

Худо хохласа уларни соғ ва саломат ота-оналарини бағрига қайтарамиз. Аввало бу балодан яратганни ўзи барчамизни асрасин. Юртимизни ўз паноҳида сақласин деб қоламиз. Бу борада барча воқеалардан мухлисларимизни хабардор қилиб турамиз",- дейди Азиз Ҳайдаров.