Ўзбекистон U-16 ўсмирлари Осиё Чемпионатидан олдин Малайзияда йиғин ўтказади

Ушбу йиғин давомида, терма жамоа бош мураббийи Александр Мочинов Осиё Чемпионатига борадиган таркибнинг ўзагини аниқлаб олишни режалаштирган.

ЎФФ Терма жамоалар маркази маълумотига кўра, Ўзбекистон U-16 ўсмирлар терма жамоаси Осиё Чемпионати олдидан сўнгги йиғинини Малайзияда ўтказади. 24 август куни Малайзияга жўнаб кетадиган Ўзбекистон U-16 ўсмирлар терма жамоаси йиғин давомида 26-28 август кунлари Малайзия ўсмирлар терма жамоасига қарши иккита ўртоқлик ўйинини ўтказади.

Малайзиядаги йиғин 31 август кунигача давом этади ва терма жамоа Малайзиядан тўғри Осиё Чемпионатида иштирок этиш учун Таиландга йўл олади.

Эслатиб ўтамиз, Таиландда бўлиб ўтадиган U-16 ўсмирлар ўртасидаги Осиё чемпионати 6-20 сентябрь кунлари бўлиб ўтади. Александр Мочинов бош мураббийлигидаги Ўзбекистон ўсмирлар терма жамоаси мусобақанинг гуруҳ босқичида Непал, Кувайт ва КХДР ўсмирлар терма жамоаларига қарши ўйнайди.

U-16 Осиё Чемпионати.
 Бангкок, Таиланд.
 «С» гуруҳи.
 Ўзбекистон
 Непал
 Кувайт
 КХДР