Ўзбекистон U-16 ўсмирлар терма жамоаси Туркиядаги халқаро турнирда иштирок этади

Шу йилнинг сентябрь ойида Таиландда бўлиб ўтадиган U-16 ўсмирлар ўртасидаги ОЧ баҳсларига тайёргарлик кўраётган Ўзбекистон U-16 ўсмирлар терма жамоаси 15 июль куни Туркиянинг Истанбул шаҳрига халқаро турнирда иштирок этиш учун жўнаб кетади. ЎФФ Терма жамоалар берган маълумотга кўра, Ўзбекистон U-16 ўсмирлар термаси мазкур турнирда 4та учрашув ўтказади.

Александр Мочинов шогирдлари турнирдаги илк учрашувини 17 июль куни Саудия Арабистони U-16 ўсмирлар термасига қарши ўтказса, 20 июль куни Иордания U-16 ўсмирларига қарши ўйнайди. Ўзбекистон U-16 ўсмирлари турнирдаги сўнгги икки ўйинини 22 июль куни Қатар ва 24 июль куни БАА ўсмирларларига қарши ўйнайди.

Эслатиб ўтамиз, Ўзбекистон U-16 ўсмирлар терма жамоаси 2-11 июль кунлари Тошкентда йиғин ўтказишган ва ЖАР стадионида Уммон U-16 ўсмирлар терма жамоасига қарши иккита ўртоқлик учрашувида майдонга тушган эдилар. Терма жамоалар ўртасидаги илк учрашувда Мочинов шогирдлари 2:0 ҳисобида ғалаба қозонишган бўлса, ўзаро иккинчи ўйинда Уммон ўсмирлари 2:1 ҳисобида ғалаба қозонди.