Ўзбекистон U-16 назорат ўйинида «Бунёдкор-2»га кичик ҳисобда мағлуб бўлди

Шу йилнинг 6-20 сентябрь кунлари Таиландда ўтказиладиган U-16 ўсмирлар ўртасидаги Осиё Чемпионати финал босқичига тайёргарлик кўраётган Ўзбекистон ўсмирлар терма жамоаси 4 август куни Тошкентда ўзининг навбатдаги ўқув-машғулот йиғинини бошлагани ҳақида хабар берган эдик.

Мазкур йиғин давомидаги сўнгги назорат учрашуви бугун «ЖАР» стадионида бўлиб ўтди ва унда Ўзбекистон U-16 ўсмирлар терма жамоаси Тошкентнинг «Бунёдкор-2» жамоасига қарши майдонга тушди. Қизиқарли кечган ўйин «Бунёдкор» ёшларининг минимал ҳисобдаги ғалабаси билан якунига етди.

Эслатиб ўтамиз, Александр Мочинов бош мураббийлигидаги Ўзбекистон U-16 ўсмирлар терма дастлаб, 5 август куни Тошкентнинг «Пахтакор» клуби ёшларига қарши майдонга тушган ва 1:3 ҳисобида мағлубиятга учраган эди. 7 август куни ўтказилган иккинчи назорат ўйинида эса Мочинов шогирдлари Тошкентнинг «Бунёдкор» клубининг U-16 ўсмирлар жамоасига қарши майдонга тушган ва йирик ҳисобда ғалаба қозонган эдилар.

Маълумот учун, Ўзбекистон U-16 терма жамоаси бош мураббийи Александр Мочинов Тошкентдаги йиғинда жами 25 нафар футболчини синовдан ўтказмоқда. Терма жамоа ўзининг навбатдаги йиғинини 13 август куни бошлаши режалаштирилган.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиландда бўлиб ўтадиган U-16 ўсмирлар ўртасидаги Осиё Чемпионатида иштирок этади.

Назорат учрашуви.
 9 август, шанба «ЖАР» стадиони.
 Ўзбекистон U-16 - «Бунёдкор-2» - 0:1