Ўзбекистон - Эрон. Бенжамин Уильямс биз учун қанчалик омадли?

Бош ҳакам - Бенжамин Уильямс. Унга қанотларда ҳамюртлари Дэвид Уэлш ҳамда Натан Макдоналд ёрдам беради. Тўртинчи ҳакам – Жаред Жиллет (Австралия).

Бу учрашув учун ҳакамлар назоратчиси сифатида Бирлашган Араб Амирликларидан Салим Саид Алсувайди тайинланган бўлса, учрашув комиссари – фаластинлик Жебрил Али. Эслатиб ўтамиз, ушбу беллашув Тошкент вақти билан соат 18:00да бошланади.

Ушбу ҳакам Ўзбекистоннинг турли ёшдаги терма жамоалари иштирокидаги ўйинларда 6 марта ишлаган.

2007 йил Олимпиада-2008 саралаши доирасидаги Жанубий Кореяга қарши баҳсда вакилларимиз 1:2 ҳисобида мағлуб бўлишган. Ўша баҳсда Уильямс ишлаган ва икки нафар футболчимизга қизил карточка кўрсатганди.

2008 йил 19 ёшли футболчилар ўртасидаги Осиё чемпионати чорак финалида Аҳмад Убайдуллаев бошчилигидаги Ўзбекистон ёшлар терма жамоаси Хитой билан тўқнаш келган. Австралиялик ҳакам бу сафар Дониёр Усмоновни четлатган, жамоамиз эса пенальтилар сериясида ғалабага эришганди.

2010 йилги Осиё ўйинлари 1/8 финалида Ўзбекистон Қатарни 1:0 ҳисобида мағлуб этган. Бу сафар Уильямснинг қадами биз учун қутлуғ келган.

ЖЧ-2014 саралаши тўртинчи босқичида Жанубий Корея билан Тошкентдаги баҳсда 2:2 ҳисоби қайд этилган. Плей-офф доирасидаги Иорданияга қарши жавоб ўйинида 1:1 ҳисоби қайд этилган ва пенальтилар сериясида ютқазиб қўйганмиз.

2015 йил январь ойида Австралияда бўлиб ўтган Осиё Кубоги гуруҳ босқичи доирасида Саудия Арабистонига қарши кечган ўйинда термамиз 3:1 ҳисобида зафар қучган.

Бундан ташқари бу ҳакам "Пахтакор" клуби иштирокидаги битта ўйинда ҳам ишлаган. 2009 йилги Осиё чемпионлар лигаси чорак финалида "шерлар" Тошкентда Саудия Арабистонинг "Ал Иттиҳод" клуби билан дуранг ўйнашган - 1:1.

Бу ҳакам "Локомотив"нинг учта ўйинида ҳакамлик қилган: Ўтган йил "Ал Садд" меҳмони бўлиб 2:6 ҳисобида мағлубиятга учраган, бу йил "Ал Иттиҳод" билан Тошкентда ўтган ўйинда 1:1 ҳисоби қайд этилган. 1/8 финал доирасидаги "Ал Ҳилол" билан баҳсда "темирйўлчилар" 2:1 ҳисобида ғалаба қозонишган.

Уильямс "Бунёдкор"нинг 6та ўйинида фаолият юритган. Қуйида барча натижалар келтирилган:
"Ал Иттифоқ" - "Бунёдкор" 4:0
"Бунёдкор" - "Ал Иттиҳод" 3:0
"Ал Ҳилол" - "Бунёдкор" 3:0
"Ал Ваҳда" - "Бунёдкор" 1:1
"Бурирам" - "Бунёдкор" 2:1
"Ал Ҳилол" - "Бунёдкор" 3:0

ЖЧ-2018. 3-тур. "A" гуруҳи
Ўзбекистон - Эрон
6 октябрь 2016. Тошкент. "Бунёдкор" стадиони. 18:00
Бош ҳакам: Бенжамин Уильямс (Австралия)
Қанот ҳакамлари: Дэвид Уэлш (Австралия), Натан Макдоналд (Австралия)
Захира ҳаками: Жаред Жиллет (Австралия)
Назоратчи: Салим Саид Алсувайди (БАА)
Комиссар: Жебрил Али (Фаластин)