Ўтган мавсум финалчиси ёхуд "Ал Ҳилол" ҳақида

Риёдликлар ўтган мавсумда ОЧЛда финалгача етиб бориб, унда омадсизлик туфайли бош совринга эга чиқишмаганди.

“АЛ ҲИЛОЛ” ФУТБОЛ КЛУБИ
Ташкил топган йили: 1957
Лақаби: “Босс”, “кўк қанотлар”
Стадиони: “Қирол Фаҳд”, 67 минг томошабинга мўлжалланган
Раҳбари: Абдулраҳмон Бин Мусаъад
Бош мураббийи: Чиприан Панаит (Руминия)
Жамоа ютуқлари: 13 карра Саудия Арабистони чемпиони (1977, 1979, 1985, 1986, 1988, 1990, 1996, 1998, 2002, 2005, 2008, 2010, 2011), 6 бор Саудия Қироли Кубоги соҳиби (1961, 1964, 1980, 1982, 1984, 1989), 12 марта Саудия Шаҳзода Кубоги соҳиби (1964, 1995, 2000, 2003, 2005, 2006, 2008, 2009, 2010, 2011, 2012, 2013), 8 карра Саудия ФФ Кубоги эгаси (1987, 1990, 1993, 1996, 2000, 2005, 2006, 2014), Осиё клублари чемпионати ғолиби (1991, 2000), Осиё Кубок эгалари кубоги ғолиби (1997, 2002), Осиё Суперкубоги соҳиби (1997, 2000), Араб Кўрфази клублари чемпионати ғолиби (1986, 1998), Араб Чемпионлар лигаси ғолиби (1994, 1995).

1957 йил ташкил этилган жамоа шу пайтгача жами 55 бор турли мусобақаларда ғолиблик нашидасини сурган. ОЧЛнинг эски формати саналган Осиё клублари чемпионатида ҳам 2 марта зафар қучган. “Ал Ҳилол” Осиёнинг ўтган асрдаги энг яхши жамоаси деб тан олинган.

Жамоа сафида миллий терма жамоага номзодлар ва 5 нафар легионер бор. Кореялик Квак Тай Хви ва бразилиялик Дигао ҳимояда тўп тепади. Пинтили таянч ярим ҳимоячи, Невес ижодкор футболчи вазифасини бажаради. Грециялик Самарас эса ҳужум чизиғида ўйнайди. Бу легионерларнинг барчаси юқори савияда ўйин кўрсатади. Айнан шу тарафдан “Ҳилол” жамоасида устунлик бор. ОЧЛ учун жамоа легионерлардан бирини рўйхатдан ўтказа олмаган.

Невес ва Шалҳуб техник имконият ва дриблинглар орқали рақибга бемалол хавф солиб, 2-3 футболчини ортда қолдиришади. Ҳужумкор футболчилар ушбу жамоанинг асосий кучи саналади. “Ал Ҳилол” маркетинг борасида жуда яхши натижаларга эга. “Mobily” компанияси тузилган шартнома туфайли риёдликлар ҳар йили 18 миллион АҚШ долларига тенг маблағга эга бўлишади. Бу жамоа либосларида компания номи реклама қилингани учун тўланадиган пул. Бундан ташқари, жамоа ҳар қандай совринни қўлга киритса, қўшимча 800 минг долларга ишлайди. Ўртача ушбу компаниядан бошқа киримлар билан ҳисоблаганда “Ҳилол” бюджетини 20 миллион доллар билан бойитиб олади.

Телевидение билан трансляциялар ҳуқуқини сотиш шартномасига Саудия Арабистони ФФ эгалик қилади. Федерация ҳар бир клубга 1,2 млн доллар миқдорида маблағ ўтказиб беради. Клуб хўжайинлари эса ҳар йили жамоа фаолият юритиши учун зарур бўлган маблағни топиб беришади. Бу пул миқдори ўртача 40 миллион долларни ташкил қилади. Чипталар сотилишидан тушган 25 фоиз маблағ хайрия жамғармаларига ўтказиб берилади.

Яқиндагина жамоага руминиялик Чиприан Панаит бош мураббий этиб тайинланди. У бунгача ёрдамчи сифатида ишлаб келаётганди.

Дарвозабонлар
1. Ҳолид Шараҳили
22. Фаҳад Алтунайян
28. Абдуллоҳ Алсдайри
32. Файз Субайҳи

Ҳимоячилар
4. Абдулла Доссари
12. Ёсир Шаҳрони
17. Абдуллоҳ    Ҳафиз
23. Квак Тай Хви (Жанубий Корея)
26. Дигао (Бразилия)
33. Султон Абдуллоҳ
35. Аҳмад Шараҳили
49. Абдуллоҳ Абдулкарим
70. Муҳаммад Жаҳфали

Ярим ҳимоячилар
7. Тиаго Невес (Бразилия)
8. Михай Пинтили (Руминия)
9. Ҳамад Ал Ҳамад
10. Муҳаммад Шалҳуб
11. Абдулазиз Давсари
13. Салман Фараж
18. Абдуллоҳ Отаиф
24. Наваф Обид
27. Сауд Харири
29. Салим Давсари
58. Абдулмажид Алсуват

Ҳужумчилар
16. Юсуф Салим
19. Ҳолид Кааби
20. Ёсир Ал Қаҳтони
77. Георгиос Самарас (Греция)


Беҳзод НАЗАРОВ тайёрлади