Осиё Кубоги-2019да тўртинчи алмаштириш қоидаси қўлланилади

Бунда мусобақа тарихида илк марта 24та терма жамоа иштирок этади. Яна шуни айтиш лозим, Осиё Кубоги пайтида ОФК ҳам ФИФАдан ўрнак олган ҳолдафутболчилар борасида тўртинчи алмаштириш қоидасини қўллайди. ОФК Ижроқўм аъзолари йиғилиш ўтказиб, якунда шундай қарорга келишди.

Мусобақанинг плей-офф босқичидан бошлаб агар ўйинларда қўшимча бўлимлар ўтказишга тўғри келса, унда жамоалар қўшимча таймларда тўртинчи ўзгаришни амалга ошира оладилар. Маълумки, Россияда бўлиб ўтган жаҳон чемпионатида шу усулдан фойдаланилди.

Бундан ташқари, 4-алмаштириш Индонезияда бўлиб ўтадиган U-19 Осиё чемпионати, кейинги йил бўлиб ўтадиган U-19 аёллар чемпионати ҳамда 2020 йил Таиландда ташкил этиладиган U-23 Осиё чемпионатида ҳам қўлланилади. Шунингдек, келаси йилдан бошлаб Осиё чемпионлар лигаси ҳамда ОФК Кубоги плей-офф баҳсларида ҳам ушбу қоида кучга киради.