Осиё чемпионати превьюси: Ўзбекистон - Эрон

Ўзбекистон футзал терма жамоаси бугун 1/4 финални амалдаги чемпион Эронга қарши ўтказади. Учрашув бизнинг вақт билан соат 11:00да бошланади. 

Чорак финал жуфтликлари:

11:00. Эрон - Ўзбекистон

13:00. Таиланд - Ироқ

15:00. Япония - Афғонистон

17:00. Индонезия - Вьетнам 

Осиё чемпионати 16та жамоа билан старт олганди. Гуруҳ ўйинлари якунига етгач, 8 жамоа мусобақани тарк этди: Қирғизистон, Жанубий Корея, Қувайт, Ливан, Тожикистон, Австралия, Саудия Арабистони, Малайзия.

Гуруҳдаги натижалар

Ўзбекистон футзал терма жамоаси осон бўлмаган гуруҳдан қийинчилик билан кейинги босқичга чиқди. Футзалчиларимиз аввалига Тожикистон билан 0:0 ўйнаб, 2-турда Австралияни 4:2 ҳисобида мағлуб этишди ҳамда охирги турда яна бир кучли жамоа Японияга 1:2 ҳисобида имкониятни бой беришди. Хайрият гуруҳдаги иккинчи ўйинда Тожикистон Австралия билан 1:1 ўйнади, агар қўшниларимиз ютиб қўйганида гуруҳда қолиб кетишимиз мумкин эди. 

Эрон эса доимгидек ўз кучини кўрсатди. Гуруҳдаги учала ўйинда уч ғалаба: Малайзия 4:1, Саудия Арабистони 2:0, Афғонистон 5:2. Натижада қўлга киритилган 9 очко ва тўплар нисбати 11-3.

Нодир Элибоев: "Биз бу ерга ютиш учун келганмиз"

Терма жамоамиз бош мураббийи Нодир Элибоев чорак финал олдидан ўз фикрлари билан ўртоқлашди:

- Масъулиятни тўлиқ ҳис қиляпмиз. Ўйин "тоза" 40 дақиқа ўйналади ва бунда ҳамма нарса бўлиши мумкин. Биз ҳар бир дақиқани ўйлаб ҳаракат қиламиз. Японияга қарши хатоларни таҳлил қилдик. Яна хатога йўл қўйсак, Эрон гол уришини биламиз, шунинг учун жуда эҳтиёт бўлишимиз керак. Ҳа, Эрон - кучли жамоа, лекин Осиё чемпионатида рақибларни биз танламаймиз. Биз бу ерга фақат ютиш учун келганмиз.

Воҳид Шамсайи эсингиздами?

2006 йилги футзал бўйича Осиё чемпионатига Ўзбекистон мезбонлик қилганди. Бу қитъа биринчилигига илк бор мезбонлик қилишимиз эди. Ўша мусобақада Эрон чемпион бўлмаган, лекин таркибида Воҳид Шамсайи деган футзалчи кетма-кет голлар уриб порлаган, натижада 16та гол билан мусобақа тўпурари бўлганди.

Ҳозир 50 ёшни қаршилаган Шамсайи Эрон футзал терма жамоасини бошқармоқда. Маъумот учун, у ўйинчи сифқатида 8 бор Осиё чемпионатида зафар қучган. Воҳид Шамсайи чорак финал ўйинидан олдин шундай деди:- Гуруҳда учта ўйинни ўз фойдамизга ҳал қилган бўлсак, ҳеч бири осон бўлмади. Рақиблар техник ва жисмоний томондан анча кучайган. Чорак финалда Ўзбекистон терма жамоасига қарши ўйнаймиз. Улар Осиёдаги энг яхши жамоалардан бири. Ўзбекистон ҳар доим кучли тўртликда бўлиб келган. Иккита катта жамоа 1/4 финалда тўқнаш келади ва кимдир мусобақани тарк этади. Лекин бу ўйин эканини унутмайлик.

Устунлик Эрон томонида

Осиё чемпионатидаги ўзаро ўйинларда устунлик Эрон томонида ва буни ҳамма билади. Шу пайтгача бу жамоага қарши 14та расмий баҳс ўтказиб, афсуски ҳаммасида мағлуб бўлганмиз ва бу рақамларни алоҳида келтириб ўтишдан фойда йўқ. Яхшиси, терма жамоамизга омад тилайлик. Зал текис, тўп юмалоқ, майдонда ҳамма нарса бўлиши мумкин. Нима дедингиз, балки бугун сенсация кўрармиз.