"Осер" Франция Биринчи лигасига йўл олди!

Ўтиш ўйинида Лига 1 да 18-ўринни эгаллаган "Сент-Этьен" ҳамда Лига 2 нинг 3-ўрин соҳиби "Осер" ўзаро беллашди. 

Жамоалар ўртасидаги дастлабки баҳсда 1:1 ҳисоби қайд этилганди. Жавоб ўйинида Амза Сахининг 51-дақиқада киритган голи билан "Осер" жамоаси ҳисобда олдинга чиқиб олганди. Бироқ Махди Камара 76-дақиқада Кривеллининг узатмасидан унумли фойдаланиб, тарози паллаларини мувозанатга келтириб қўйди. Шу тариқа, иккинчи ўйиннинг асосий вақти ҳам биринчиси сингари 1:1 ҳисобида поёнига етди. Қўшимча вақтларда ҳам таблодаги рақамлар ўзгармади. Пенальтилар сериясида эса 5:4 ҳисобида "Осер" клуби зафар қучиб, асосий дивизонга йўлланмани қўлга киритди. "Сент-Этьен" эса иккинчи лига сари равона бўлди.