Ўртоқлик учрашуви. "Пахтакор" "Динамо"ни мағлуб этди

Биринчи бўлимда самарқандликларга қарши Илҳом Мўминжонов бошчилигидаги ёшлар таркиби баҳс олиб борди. Бўлим мобайнида ёш футболчиларимиз тажрибали рақибдан ортда қолмасликка интилишди. Улар буни уддалашди ҳам. Ҳимоячилар деярли бехато ҳаракат қилишди. Икки бор Рибкин қийин вазиятда яхши ўйнади. Танаффусга жамоалар голсиз дуранг билан йўл олишди.

Иккинчи бўлимда асосий таркиб туширилди. Андреевнинг икки зарбаси кескин ҳолатни юзага келтирди, бироқ рақиб посбони маҳорати ва ноаниқ зарба ҳар икки вазиятда фойда келтирмади. 69-дақиқада Стас жарима зарбасидан унумли фойдаланди. 22 метрлардан белгиланган жаримани Андреев ажойиб тарзда дарвозага йўллади. Ушбу натижа ўйин охиригача ўзгармади ва жамоамиз ғалаба қозонди. Навбатдаги назорат учрашуви 26 июль, шанба куни "Жар" стадионида Ўзбекистон 23 ёшгача бўлган терма жамоасига қарши ўтказилади.

"Пахтакор" - "Динамо" - 1:0 (0:0)

"Пахтакор": Рибкин (Турсунбоев, 31), Исроилов, Григорьев, Ибр.Абдуллаев, Аъзамов (Отахонов, 33), Соҳибов, Мирзаев (Хурсанов, 33), Махситалиев, Cидиқов (Ж.Юсупов, 33), Рогованов, А.Юсупов.

Иккинчи бўлим: Лобанов, Мерзляков, Убайдуллаев, Фомин, Болтабоев, Махарадзе, Қиличев, Машарипов, Андреев, Каримов, Солиев.

Гол: Андреев, 69 - 1:0.