Омад Аргентинани финалга олиб чиқди

Ўйин ҳақида кўп тўхталиб ўтмоқчи эмасмиз. Жуда ёрқин кечиши кутилган ўйин, кутилмаганда кўпчиликни тахминларини пучга чиқарди. 

Учрашув асосан майдон марказида кечди. Асосий вақтда деярли хавфли вазиятлар кузатилмади. Қўшимча таймда Родриго Паласионинг жуда қулай имкониятга чиқиб борагани ва Силессен тўпни эгаллаб олганини таъкидлаб ўтиш мумкин.

Голландия таркибида кутилганидек Арьен Роббен қолган футболчиларга нисбатан фаол ва ҳаракатчанг бўлди. Аргентинадан эса Маскеранонинг ўйинини алоҳида айтиб ўтиш мумкин.

Умуман жамоалар ҳимояда анча эҳтиёткорлик билан ҳаракатланишди ва деярли орқа чизиқда хатолар кузатилмади.

Сокинлик остида кечган 120 дақиқадан сўнг беллашувни бошқариб борган Жунайт Чақирнинг хуштаги янгради ва навбат ҳал қилувчи паллага етиб келди. Пенальтилар сериясида ўтган гал омади келган учар-голландларнинг "қаноти" Тим Крул бу сафар Луи ван Гаал томонидан майдонга туширилмади. Силессен эса "лоторея" баҳсида Тим Крул кўрсатган жасоратни намойиш қилолмади ва ҳеч бир зарбани бартараф эта олмади.

Аргентина посбони Ромеро эса аввалига Влаарни, кейинчалик эса Снейдерни уринишларини йўққа чиқарди ва жамоасини финалга олиб чиқди.

Энди ярим финалда омадсизликка учраган Бразилия ҳамда Голландия жамоалари учинчи ўрин учун баҳсда ўзаро беллашишади.

Мундиалнинг ҳал қилувчи учрашувида эса Германия Аргентина билан тўқнаш келади. 1990 йилги финал такрорланади.

Месси ватандошлари 1990 йилги ва ўтган мундиалдаги қақшиткич зарбага жавоб қайтара олишадими? Ёки "немис машинаси" ўз йўналиши бўйлаб ҳаракатланишда давом этадими? Бу саволлар жавобини яқин кунлар ичида билиб оламиз!

Финалда кўришгунча...

ЖЧ-2014. Ярим финал

ГОЛЛАНДИЯ – АРГЕНТИНА 0:0 (пен. 2:4)

Бош ҳакам: Жунайт Чақир (Туркия).

Голландия: Силессен, Влаар, Де Врей, Мартинс Инди (Янмат, 46), Блинд, Де Йонг (Класи, 62), ван Перси (Хунтелаар, 96), Снейдер, Куйт, Вейналдум, Роббен.