"Олмалиқ": Жамоа раҳбарияти билан учрашув

Бугун жамоа аъзолари Тошкент вилояти Аҳмад Яссавий маҳалла ҳудудида жойлашган стадионда машғулот ўтказишди.

Кечки пайт эса жамоа раҳбарияти билан учрашув бўлиб ўтди. Янги мавсум арафасида ташкиллаштирилган бу учрашувга жамоа бош ҳомийси Олмалиқ Кон-металлургия комбинати молия ва иқтисод бўйича директори Ўктам Деҳқонбоевич Каримов ташриф буюрди.

Бир соатга яқин давом этган йиғилишда жамоа раҳбариятига 2017 йилда "Олмалиқ" шарафини ҳимоя этувчи футболчилар ва мураббийлар штаби бош директор Иброҳим Юлдашев томонидан таништирилди. Шундан сўнг, Ўктам Деҳқонбоевич жамоага омад тилади. Суҳбат давомида жамоа олдида юқори мақсадлар қўйилганлиги таъкидланди. 2016 йил якунида жамоада амалга оширилган ўзгаришлар шунчаки эмаслиги, яқин йилларда Олмалиқда мамлакат футболи ривожига ўз ҳиссасини қўшадиган рақобатбардош жамоа бўлиши ҳақида сўз борди.

Ўктам Каримов суҳбат давомида жамоа келажагига доир қуйидагиларни айтиб ўтди. - "Олмалиқ шаҳрида халқаро талабларга жавоб берадиган жамоа тураргоҳи ва ўқув-машғулот мажмуасини барпо этиш йўлида изланишлар олиб борилмоқда ва бу режа босқичма-бочқич амалга оширилади. Бу йилдан ишқибозлар учун махсус электрон абонементлар чиқарилди. Стадион ҳудудида клуб атрибутикалари сотувини ташкил қилувчи дўкон очилади. Бу дўконда "Олмалиқ" жамоасига алоқадор маҳсулот билан бир қаторда, Ўзбекистон чемпионатида иштирок этадиган бошқа жамоалар билан келишган ҳолда уларнинг атрибутикалари ҳам сотуви ташкил этилади. Шунингдек, жамоа учрашувларини Олмалиқ ТВ орқали кўрсатиш ҳам режалаштирилмоқда. Бу ишларнинг барчаси Олмалиқда футболни ривожлантириш, кўп минг сонли ишқибозларга қулайликлар яратиш учун амалга оширилмоқда. Ташкилий ишлар билан бир қаторда футболчиларнинг мазмунли ва шиддатли ўйин намойиш этиши ҳам муҳимдир. Сиз қанчалик яхши ўйин намойиш этсангиз жамоа мухлислари шунчалик кўпаяди. Ўйлайманки, Виктор Балютович жамлаган бу таркиб жамоа ишқибозлари ва раҳбарият ишончини қозонади."

Учрашув давомида жамоа бош мураббийи Виктор Балютович Кумиков ҳам сўз олиб, жамоа учун мавсумолди тайёргарлик босқичи яхши ўтганлигини, буёғига жамланган футболчилар билан юқори мақсад сари одимлашга тайёр эканлигини билдирди. Футболчилар номидан сўз олган жамоа сардори Ислом Иномов ҳам раҳбарият томонидан яратиб берилган шароит учун миннатдорчилик билдирди. Жамоа футболчилари олдиларига қўйилган вазифани бажариш йўлида бор имкониятларини ишга солишларини таъкидлади.

Яқин кунларда жамоа таркибини ОАВ ва ишқибозларга таништирув маросими ҳам ташкил этиш режалаштирилмоқда. Бу ҳақда кейинроқ маълумот бериб ўтамиз.