Олий лига. 14-тур рамзий терма жамоаси

Дарвозани "Локомотив" посбони Игнатий Нестеровга ишониб топширдик. "Динамо" билан ўйинда Нестеров бир қатор вазиятларда жамоасини муқаррар голлардан сақлаб қолишга эришди.

Ўша ўйинда "темирйўлчилар" ўнг қанот ҳимоячиси Шуҳрат Муҳаммадиев ҳам фаол ўйнади. Ҳужумларга ўтишда ҳам ҳимояланишда ҳам Муҳаммадиев яхши ҳаракат қилди.

"Бухоро" ўз тарихида илк бор "Бунёдкор"ни мағлуб этди. Мазкур учрашувда мезбонлар сафида ҳимоячи Артём Филипосян биринчи гол урилишида катта хисса қўшди, бундан ташқари рақиб ҳужумчиларига деярли имконият бергани йўқ. Ҳужумчи Иван Нагаев эса яхши формада эканлигини чиройли гол уриб исботлаб қўйди.

"Пахтакор" марказий ўйинда "Насаф"дан устун келди. Бу ўйинда мезбонлар ҳимоячиси Хожиакбар Алижонов ўзини яхши томонлама кўрсатди. Ярим ҳимоячи Шерзод Каримов эса Сергеевга голли пас оширди ҳамда ўзи гол уришга эришди.

"Навбаҳор" Наманганда "Олмалиқ" билан дуранг қайд этди. Шу куни ярим ҳимоячи Азизбек Турғунбоев майдондаги энг фаоллардан бири бўлди.

"Қўқон-1912" ўз майдонида "Сўғдиёна"ни таслим қилди. Ярим ҳимоячи Суҳроб Бердиев доимгидек чаққон ҳаракатлари билан рақибларни шошириб қўйди. Бунга қўшимча равишда ўз ҳисобига гол ҳам ёзиб қўйди.

"Металлург" Бекободда "Қизилқум"дан устун келди. Учрашувда майдон эгалари сафида Алишер Зиёвутдинов ўзини яхши сифатларини кўрсатиб рамзий терма жамоадан ўрин олди.

"Шўртан" бу турда "Обод"ни қабул қилиб 2:0 ҳисобида зафар қучди. Жамоа сардори Игорь Таран гол урди ва майдонда жуда фаол ҳаракат қилди.

Фарғонанинг "Нефтчи" клуби "Машъал" меҳмони бўлиб 2:2 ҳисобида дуранг ўйнаб қайтди. Учрашувда водий клуби сафида Мўйдин Мамазулумов кетма-кет иккинчи тур гол уришга эришди.

championat.asia сайти талқинига кўра 14-турнинг рамзий терма жамоаси:

Дарвозабон
Игнатий Нестеров "Локомотив"

Ҳимоячилар
Шуҳрат Муҳаммадиев "Локомотив"
Артём Филипосян "Бухоро"
Хожиакбар Алижонов "Пахтакор"

Ярим ҳимоячилар
Азизбек Турғунбоев "Навбаҳор" (2-марта рамзий терма жамоада)
Суҳроб Бердиев "Қўқон-1912" (2)
Алишер Зиёвутдинов "Металлург" (2)
Шерзод Каримов "Пахтакор" (3)

Ҳужумчилар
Иван Нагаев "Бухоро" (3)
Игорь Таран "Шўртан" (2)
Мўйдин Мамазулумов "Нефтчи" (2)