Олий лига. 12-тур рамзий терма жамоаси

Бу тур сенсацияси Бекободда қайд этилди. Олий лигани муваффақиятсиз тарзда бошлаган "Металлург" клуби ўз майдонида кучли учликда бораётган Қаршининг "Насаф" клубини қабул қилди. Ўйинда майдон эгалари Аюбхон Нўъмоновнинг голи эвазига ғолиб бўлди. Шу куни бекободликлар посбони Суҳроб Султонов бир неча марта ўз жамоасини голдан қутқарди.



"Навбаҳор" - "Бунёдкор" учрашувида дуранг қайд этилди. Майдон эгалари сафида ҳимоячи Жаҳонгир Меҳмонов фаол ҳаракатлари билан бошқалардан ажралиб турди. "Қалдирғочлар" таркибида ярим ҳимоячи Достонбек Ҳамдамов ўз голи билан жамоасига бир очко келтирди.



"Пахтакор" Тошкентда Жиззахнинг "Сўғдиёна" клубини мағлуб этди. Шу куни майдон эгалари ярим ҳимоячиси Шерзод Каримов чиройли гол уришга ва Сергеевга голли пас оширишга эришди. Меҳмонлар ютқазишган бўлса ҳам Сарваржон Жўраев яхши ўйнади ва гол урди ҳам.



"Қизилқум" Самарқандда "Динамо"ни 1:0 ҳисобида таслим қилиб қайтди. Шу куни Навоий клуби марказий ҳимоясида ўйнаган Виктор Григорьев ўзидан яхши таассурот қолдира олди.

"Олмалиқ" Ғузорда "Шўртан"ни мағлуб этишнинг уддасидан чиқди. Виктор Кумиков жамоасига ғалаба келтирган голни Дилшод Жўраев мезбонлар дарвозасига урди.

Бу турда "Нефтчи" Тошкентда "Локомотив"га йирик ҳисобда мағлуб бўлди. Чемпионат тўпурари Марат Бикмаев учрашувда иккита гол уриб дублга эришди.



"Машъал" ўз мухлислари қаршисида "Обод"ни йирик ҳисобда енгди. Шу куни муборакликлар сафида Зафар Тўраев қолганлардан кўра анчагина фаол бўлди.



"Қўқон-1912" бу сафар ўз майдонида "Бухоро"дан устун келди. Сўнгги пайтларда жуда кўп тилга олинаётган Жавоҳир Сидиқов бухороликлар билан ўйинда чаққон ҳаракатлари ва аниқ тўп узатишлари орқали мухлислар олқишларига сазовор бўлди. Айнан унинг ишлаган жарима тўпидан сўнг гол урилганини ҳам айтиб ўтиш мумкин.

championat.asia сайти талқинига кўра 12-турнинг рамзий терма жамоаси:

Дарвозабон
Суҳроб Султонов ("Металлург")

Ҳимоячилар
Жаҳонгир Меҳмонов ("Навбаҳор") (3-марта рамзий терма жамоаси)
Сарваржон Жўраев ("Сўғдиёна")
Виктор Григорьев ("Қизилқум")

Ярим ҳимоячилар
Аюбхон Нўъмонов ("Металлург")
Шерзод Каримов ("Пахтакор") (2)
Достонбек Ҳамдамов ("Бунёдкор") (4)
Зафар Тўраев ("Машъал") (3)
Жавоҳир Сидиқов ("Қўқон-1912") (2)
Дилшод Жўраев ("Олмалиқ")

Ҳужумчи
Марат Бикмаев ("Локомотив") (5)