ОФК Криштиану Роналдуни жаримага тортди

ОФК "Ал Насср" клуби футболчиси Криштиану Роналдуни жаримага тортди. Гап шундаки, Роналду ОЧЛ чорак финалидан ўрин олган "Ал Насср" – "Ал Айн" ўйинидан олдин ўтказилган матбуот анжуманида мусобақанинг расмий ҳомийси бўлмаган брендни реклама қилган. ОЧЛ тартиб-интизом қўмитаси Криштиану Роналдуни 15 минг АҚШ доллари миқдорида жаримага тортди. Бундан ташқари, Роналду турнир қоидаларига амал қилишини таъминлай олмагани учун "Ал Насср" клуби ҳам 7500 АҚШ доллари миқдорида жаримага тортилди.

Шу йилнинг 11 март куни ўтказилган "Ал Насср" – "Ал Айн" учрашувидан олдинги матбуот анжуманига эътибор қаратилса, Роналду нега жаримага тортилгани деярли аниқ бўлади.

Криштиану ўша матбуот анжуманида ўзи билан бирга "Ursu" номли сувни олиб кирган. "Ursu" Криштиануга тегишли ичимлик суви бренди ҳисобланади. Роналду ушбу сувни ижтимоий тармоқдаги саҳифаларида фаол тарзда реклама қилиб келади.