Одил Аҳмедов: "КХДРни кучсиз томонларидан фойдаланишимиз керак"

Расмий машғулотлардан сўнг, "микст ҳудуд"да футболчимизнинг ўйин олди фикрлари билан қизиқдик.

"Кўриб турганингиздек, машғулотларда тўлиқ қатнашаяпмиз. Жамоада барчанинг соғлиғи жойида. Шу жумладан менинг ҳам. Биринчи ўйин олдидан барчада ҳаяжон бўлади. Ҳар ҳолда тўрт йилликнинг энг муҳим мусобақаси, биринчи ўйинда ғалаба қозонишимиз жуда муҳим", - дея гап бошлади Одил Аҳмедов.

Мана уч кундирки терма жамоамиз КХДР терма жамоасини ўрганиш билан банд. Жамоанинг ўйинлар акс этган маълумотлар асосида рақибга қарши тайёргарлик олиб бориляпти. Бу жамоанинг бугунги ҳолати ҳақида "Кроснадар" футболчиси шундай дейди:
- Асосан ҳимояга эътибор қаратадиган жамоа. Аммо бўш нуқталари йўқ эмас. Асосий эътиборни ўша томонларга қаратган ҳолда, кичик имкониятлардан ҳам фойдалана олишимиз керак. Аниқ бир футболчини эса ажратиб ўта олмайман. Муҳими биз ўйинга тайёрмиз.