Одил Аҳмедов: "Барча масъулиятни тўлиқ ҳис қилган ҳолда ўйнади"

"Учрашув қийин кечишини олдиндан билардик. Шунингдек, биринчи даврадаги Шимолий Кореяда ўтган ўйинда аламли мағлубиятга учрагандик. Шу боисдан бугун нима бўлган тақдирда ҳам ғалаба иштиёқида майдонга тушгандик. Ўтган галги мағлубият учун муносиб тарзда жавоб қайтара олдик. КХДР терма жамоасини жуда синчиковлик билан ўргангандик ва уларни қандай ўйнашларидан бохабардик. Ўз ниятимизга етганимиздан бениҳоят хурсандмиз. Ҳисобда орқага қолаётганимизга қарамай иродали ғалабани қўлга киритдик. Бугун бутун жамоа билан ҳамжиҳатликда ўйнадик ва жуда муҳим уч очкога эга чиқдик. Ютуқнинг асосий омили деб ғалабага бўлган катта иштиёқни айтган бўлардим. Мухлисларнинг кўмаги ҳам, уларнинг олқишлари ҳам бугунги ғалабага сабабчи бўлди. Уларга ўз миннатдорчилигимни билдираман. Барчамиз масъулиятни тўлиқ ҳис этган ҳолда ўйнадик ва ўз мақсадимизга эришдик", - дейди Одил Аҳмедов.