ОЧЛ. Жилсон Да Соуза: "Гуруҳдаги энг яхши жамоа "Локомотив" эди..."

"Афсуски икки клуб ҳам гуруҳдан чиқа олмади, шу боис эртага ўзига хос ўртоқлик ўйини бўлади. Аммо биз гуруҳ босқичини ғалаба билан тугатишни истаймиз", - деди бош мураббий. 

"Бизнинг жамоа эртанги баҳсга тайёр. Охирги учрашувни Дохада ўтказдик ва бу ўйинга тайёргарлик кўрдик. Эртага ғалаба қозониб мавсумни яхши кайфиятда тугатмоқчимиз", - деди дарвозабон. 

- Қатарда мавсум тугаганига анча бўлди. Клубингиз ўтган ўйинни ОЧЛ доирасида ўтказди ва бунга анча бўлди. Жамоа консентрацияни йўқотиб қўймадими? Жисмоний ҳолат яхшими? 

- Биз тонусни ёки консентрацияни йўқотдик деб ўйламайман. Сабаби машғулотлар давом этмоқда. Эртанги баҳсда ким қандай натижа қайд этса ҳам гуруҳдан чиқа олмайди. Гуруҳдаги энг яхши жамоа "Локомотив" эди, аммо футболда доим ҳам яхши жамоа кейинги босқичга чиқавермаслигини кўрдик. 

- Гуруҳ босқичидаги ягона ғалаба "Локомотив"га қарши ўйинда қўлга киритилди. Эртага ҳам юта олишингизга ишонасизми?

- Биз ҳар бир ўйинда ютишга ҳаракат қилдик. "Ал Иттиҳод" билан ўйинда асосан иккинчи таркибни туширдик ва мағлуб бўлдик. Бу қанчалик тўғри ёки нотўғри эканлигини билмайман. Эртанги баҳсда эса босим йўқ ва гуруҳни ғалаба билан тугатмоқчимиз.

- Футболчиларда мотивация борми?

Абдулазиз Фаҳад: - Ҳа, бизда иштиёқ ва хоҳиш бор. Қатарда чемпионат тугади ва мавсумни ғалаба билан тугатишни жуда ҳам хоҳлаймиз.

- Клуб ОЧЛда гуруҳдан чиқа олмаслиги аниқ. Шу боисдан қайсидир етакчиларга дам бериб уларни Қатарда қолдирдингизми ёки барча кучли ўйинчилар Тошкентга олиб келиндими?

- Деярли тўлиқ таркибда келганмиз. Фақат икки футболчимизда жароҳат бор, улар Дохада қолишди. Қолган барча футболчилар Тошкентга келишди.

- Қатар Юлдузлар лигасида клуб мавсумни тўртинчи ўринда тугатди ва кейинги йил ОЧЛ плей-оффига йўлланма қўлга киритилди. Раҳбарият бу натижадан қониқдими?

- Бу йил ҳам Эрон клубини мағлуб этиб гуруҳ босқичига чиққандик. Кейинги йил ҳам шундай бўлишига умид қиламан. Қатар чемпионатида албатта барча сингари чемпион бўлишни истагандик, бироқ доим ҳам сен истаган нарса рўй беравермайди.

- Амир Кубоги боис "Ал Иттиҳод" билан ўйинда бир қатор етакчиларга дам бердингиз. Бу Амир Кубоги сизлар учун кўпроқ муҳимлигини билдирадими?

- Бу биринчи навбатда клуб қарори ҳисобланади. Раҳбарият қайси мусобақа муҳим эканлигини айтса ўша мусобақага кўпроқ эътибор қиламан. Иккала мусобақа ҳам керакли, аммо икки фронтда ҳам курашиш учун етарли футболчилар йўқ. Шу боис ОЧЛда баъзида футболчиларга дам бердим. Амир Кубоги ғолиби ОЧЛга йўлланма беради, шу сабабли ҳам бу мусобақа нуфузи баландроқ.

ОЧЛ-2019. Нима учун "Локомотив" сўнгги турда ғалаба қозониши шарт?