ОЧЛ. Бранко Иванкович 0:4 ҳисобидаги мағлубият йўққа чиқишига ишонмоқда

Тошкент вақти билан 21:00да бошланадаиган беллашувда Эроннинг "Персеполис" ва Саудия Арабистонининг "Ал Ҳилол" клублари ўзаро кураш олиб боришади. Маълумки, БААда кечган биринчи ўйинда саудияликлар 4:0 ҳисобида зафар қучишган. 

"Персеполис" клуби бош мураббийи Бранко Иванкович ўйиндан олдинги матбуот анжуманида шогирдлари йирик мағлубият аламини олиб финалга чиқа олишлари ҳақида айтиб ўтди: 

"Тўғри, биз дастлабки учрашувда 0:4 ҳисобида ютқазиб қўйдик, аммо бундан ваҳима қилиш керак эмас. Чунки мен шогирдларимга ишонаман ва жавоб баҳсида биз ҳам йирик ҳисобда ғалаба қозона оламиз". 

"Мен ўз вақтида Саудиянинг "Ал Иттифоқ" клубида ишлаганман ва айтишим мумкин, "Ал Ҳилол"ни жуда яхши биламан. Шубҳасиз, "Ал Ҳилол" Осиёнинг энг кучли клубларидан бири ва биз ҳам ярим финалда бўлиб турганимиздан мамнунмиз". 

"Агар финалга йўлланмани қўлга кирита олсак, Осиё чемпионлар лигасида ғолиб чиқишимизга тўлиқ ишонаман. Шуни айтишим керак, "Ал Ҳилол" ҳали ҳеч кимга 0:5 ҳисобида ютқазиб қўймаган, лекин бу ҳам бизни орзу қилишдан тўхтата олмайди".