"Обод" футболчилари антирекорд қайд этишди

Бу ўйинда "Пахтакор" 4:1 ҳисобида ғолиб бўлди. Эътиборли томони олий лига дебютанти бўлган "Обод" клуби ҳужумчиси Шохруз Норхонов пенальтидан гол ура олмади. Учрашувнинг 67-дақиқасида Норхоновнинг 11 метрли жарима тўпидан йўллаган зарбасини "Пахтакор" посбони Никита Рибкин қайтаришга эришди. 

Қизиғи "Обод" футболчилари бу мавсумда жами тўрт марта пенальти тепиш ҳуқуқини қўлга киритишди ва умуман гол ура олишмади. 9-турда "Нефтчи"га қарши баҳсда Павел Соломиннинг "нуқта"дан йўллаган зарбасини посбон қайтариб қолганди. 11-турда "Машъал" билан баҳсда эса Санжар Тўрақулов ва Шерзод Жалилов 11 метрли жарима зарбасидан сўнг гол ура олишмаганди.

Шундай қилиб, 4 марта пенальти тепиш ҳуқуқига эга бўлган тошкентликлар уларнинг ҳеч биридан фойдалана олишмади ва Ўзбекистон чемпионати антирекордини қайд этишди.

Маълумот учун, "Обод" дарвозасига 6 марта пенальти белгиланган ва уларнинг 5таси гол билан тугаган.