Нўъмон Ҳасанов йирик мағлубиятдан сўнг: "Истеъфо? Бунга тайёрман"

"Футболчилик фаолиятимда ҳам, мураббийликда ҳам бунчалик йирик ҳисобда ютқазмаганман. АГМК жамоасини табриклайман, улар ҳақли равишда ютишди", - деб сўз бошлади Ҳасанов.

-Жамоа аввалги турларда яхши, курашувчан ўйин намойиш этганди. Бугун эса жамоа бўшашди. Мураббий сифатида бунга нима сабаб деб ўйлайсиз?

- "Андижон"га қарши ўйинимиз чиқмади. Шунинг учун таркибни ўзгартириб, ёш футболчиларга имкон бергандим. Ҳақиқатдан ҳам аввалги турларда намойиш этган ўйинимиз бугун бўлмади. Майдондан четлатилган футболчимиз ичкарида йиғлаб ўтирибди. 

-Пенальти белгиланган вазиятда майдонга тушиб кетдингиз. Айнан нимадан норози бўлдингиз?

-Ўша вақтда футболчимизни юпатмоқчи эдим. Вазиятни юмшатмоқчи эдим. Ўша вазиятда йигитларимиз қизиша бошлашганди. Агар яна қизил карточка оладиган бўлсак бу жуда ёмон бўларди. Чунки, захира ўриндиғимиз ҳам у қадар катта эмас.

-Учта турдан сўнг ҳали ғалаба қозонмадингиз. Бундан ташқари, бугунги ҳисоб сизнинг истеъфоингизга таъсир қилмасмикин?

-Мен тайёрман. Айтиб ўтганимдек, илк маротаба бундай мағлуб бўлдим. Шунинг учун, бундай вазиятларга мен тайёрман. Менинг ўрнимда бошқа мураббий бўлганида ҳам шундай фикр билдирган бўларди деб ўйлайман. 

-Бугунги натижадан сўнг мухлисларга нима дея оласиз?

-Мухлислардан узр сўраймиз. Чунки, "Қўқон-1912" хеч қачон ютқазмаган. Биз жамоага бефарқ бўлмаган барчадан кечирим сўраймиз. Узоқ йўл босиб келиб, бизни қўллаб-қувватлагани келишганди.