Нодир Элибоев: "Бишкекдаги саралашга энг оптимал ҳолатдаги таркиб билан борамиз"

Ўйиндан сўнг терма жамоамизнинг ёрдамчи мураббийи Нодир Элибоев фикрларини билдирди. 

"Қирғизистон билан ўйин саралаш баҳсларидан олдин айни муддао бўлди, деб ўйлайман. Чунки гуруҳимизда Тожикистон, Непал, Афғонистон ўрин олган. Йигитлар ҳали оптимал формада эмас. Бу икки ўйинда турли тактикаларни синовдан ўтказдик. Айрим ёш футзалчилар текшириб олинди. Шунга қарамай кўнглимиз тўлди", - дейди Нодир Элибоев.

- Бугунги беллашувда биринчи ва иккинчи бўлим охирларида устунлик рақиб томонига ўтди. Умуман олганда уларнинг ўйинига мослашиб қолгандек кўринди...

- Бундай демаган бўлардим. Рақибимиз олдинга ўтиши, биз эса ўйинни назорат қилишимиз керак эди. Ярим майдонда хотиржам ҳаракат қилдик. Дарвозабон ўз ишини яхши бажарди. 

- Агар Рустам Умаровнинг сейвлари бўлмаганида, балки гол ўтказишимиз мумкин эди. Бу борада фикрингиз қандай?

- Кераклиги иккинчи бўлимда ҳимоямизни кўриб олдик. Ўйинни 5 дақиқасини мудофаада ўтказиб қарши ҳужумимизни текширдик. Барчаси режадагидек. 

- Саралаш босқичи мезбони Бишкекда ҳам ўртоқлик учрашуви ўтказилиши кўзда тутилганми?

- 3,4 саналарда ўртоқлик ўйинида иштирок этишимиз керак эди. Аммо маълум сабабларга кўра амалга ошмай қолди. Туркманистон терма жамоасини мамлакатдан чиқаришмади. Шу боис тўғри саралашга йўл оламиз. 

- Кўнглингиз тўлмаётган жиҳатлар борми?

- Жалб қилинган янги футзалчиларга камиди бир ёки икки йил вақт беришимиз керак. Ҳеч ким бирданига ўйнаб кетгани йўқ. Ёшларимиз бор. "Динамо" жамоасига катта раҳмат айтаман. Дилшод ака кўп ўйинчиларни етиштириб беряптилар. Бу бизнинг ютуғимиз. Равшан Элибоев 4 апрель куни сафимизга қўшилади. Аббос Элмуродов, Рустам Умаров каби посбонларимиз шай. Олдинда йиғинларимиз яна бўлади. Энг керакли ва оптимал ҳолатдаги таркиб билан мусобақага борамиз.