Неъматилла Қутибоев: "Ўйин охирида диққатни йўқотиб, жазоландик. "Динамо" ва "Локо" таркиб жиҳатдан Суперлигага даъвогар"

"Самарқанд жамоасини ғалаба билан табриклайман. Ўйинга келадиган бўлсак, баҳс шиддатли ўтди. Ўйин давомида ёмон ҳаракат қилмадик. Аммо фақат учрашувнинг охирида диққатни йўқотдик ва жазоландик. Гол киритилган вазиятда қарши ҳужумга чиқиб, қайтишга улгурмадик. 

Саламат Қутибоевнинг қайтиши жамоа ўйинини ўзгартирдими? Тажрибали ўйинчининг қайтиши, таркибимизни кучайтиргани рост, аммо ўтган мавсум Биринчи лигада ҳам шу услубда тўп сургандик. Тан олиш керак, Биринчи лига ва Про лига ўртасида фарқ катта, биз ҳали яна ишлашимиз керак. Таркибни бу йил кучайтира олдик. 

Молиявий ҳолатимиз қандай? Бу борада ҳозирча муаммо йўқ, ҳаммаси жойида.

Бу мавсумдаги мақсад? Мақсадимиз – ҳар ўйинда ғалаба учун курашиш. Шу орқали қандайдир натижа қайд этиш мумкин.

"Локомотив" ва "Динамо" билан баҳсимизни таққосласам, икки ўйинда ҳам гранд жамоаларга қарши муносиб тўп суришга интилдик. Айтишим мумкинки, "Динамо" ва "Локо" - тенг кучли жамоалар. Таркиб жиҳатдан ҳам икки клуб Суперлигага даъвогар", - дейди Нукус жамоаси бош мураббийи.