"Нефтчи" икки нафар ёш футболчи билан шартномани узайтирди

Жамоа бош мураббийи Илҳом Мўминжонов янги мавсумга ҳар жиҳатдан пухта тайёргарлик билан бориш мақсадида таркибни ёш, иқтидорли ўйинчилар билан мустаҳкамлаш масалаларига жиддий эътибор бермоқда. Бугун ёшлар жамоасида тўп тепган ярим ҳимоячи Азаматжон Толибжонов билан тузилган 3 йиллик шартнома бунга яққол далилдир. Бу футболчи "Нефтчи" U-18 таркибида 21 марта майдонга тушиб, рақиблар дарвозасини 9 марта ишғол қилишдан ташқари, тенгдошларига голли узатмаларни амалга оширишда ҳам ибрат кўрсатди. Шу боис, минг-минглаб мухлислар ва мутахассислар назарига тушди.

Бундан ташқари ёш дарвозабон Шоҳруҳ Асқаралиевга ҳам юксак ишонч билдирилиб, Суперлига жамоаси таркибида маҳорат кўрсатиш юзасидан 3 йилга мўлжалланган шартнома имзоланди. Маълумки, дарвозабон ҳар қандай учрашувда ўйин тақдирини ҳал қилувчи фигура ҳисобланади. Шоҳруҳ буни чуқур англаган ҳолда 2021 йилги мусобақаларда ўзининг ёрқин ва чиройли ўйинлари билан нафақат мураббийлар, балки кўпминг сонли футбол ишқибозларини ҳам эътиборига сазовор бўлди.