"Навбаҳор": Янги футболчилар тақдири шу кунларда хал бўлади

Жамоа мураббийлар штабида Роберт Гай иш бошлаганидан сўнг, мураббий ўзи яхши билган айрим ўйинчиларни жамоасига таклиф этган. Аммо клуб матбуот хизматининг маълумотига таяниб айтадиган бўлсак, кўрикдан ўтиш учун келган янги футболчиларнинг тақдирига шу кунларда ойдинлик киритилади.

Айтиш лозимки, бугунги кунда жамоа машғулотларида кўплаб янги номлар иштирок этмоқда. Павел Леус ("Шўртан"), Темур Яфаров ("Қизилқум"), Аҳрол Рисқуллаев ("Динамо"), Дурбек Умаралиев ("Сўғдиёна"), Рустам Аъзамов ("Локомотив"), Оятулло Муҳиддинов ("Пахтакор-2"), Аюбхон Гаппаров ("Рубин") каби футболчилар иккинчи даврани "Навбаҳор"да ўтказишни мақсад қилишган. Аммо сўнгги қарорни мураббийлар штаби қабул қилади.

Профессионал футбол лигаси олий лига жамоаларининг 10 августга қадар футболчиларни рўйхатдан ўтказиши мумкинлигини эълон қилган. Унга қадар яна бошқа ўзгаришлар бўлиш эхтимоли ҳам йўқ эмас.

Исломбек Рустамбеков