"Навбаҳор": Тарбияланувчиларимиз Ўзбекистон чемпиони!

Аввал хабар бериб ўтганимиздек, мусобақанинг финалига Наманган вилояти ва Тошкент шаҳри терма жамоалари йўл олишганди. Ўзбекистон чемпионатининг финал учрашувида вилоят терма жамоаси ўзагини ташкил этган “Навбаҳор-Умид” футбол мактаби тарбияланувчилари 2:1 ҳисобидаги ғалабани қўлга киритиб, 2005 йилда туғилган футболчилар ўртасида Ўзбекистон чемпиони деган шарафли номга сазовор бўлишди. Вакилларимизга ғолибликни тақдим этган голларга Муҳаммадсодиқ Абдуллаев ва Диёр Баҳромжоновлар муаллифлик қилишди. Тошкент шаҳри вакилларининг ягона жавоб тўпи Лазизбек Ҳакимов ҳисобига ёзилди.

Финал учрашуви якунига етгач, мусобақанинг тантанали ёпилиш маросими бўлиб ўтди. Ғолиб ва совриндорларга чемпионат медаллари ва дипломлар топширилди. Вилоятимиз терма жамоаси аъзолари кичик олтин медалларга сазовор бўлишди. Тошкент шаҳри вакиллари фахрли иккинчи ўринни эгаллаб кумуш медалларга лойиқ топилишган бўлса ярим финалда имкониятни бой берган Навоий ва Тошкент вилояти вакиллари бронза медаллари билан тақдирланишди. Шунингдек, турли номинациялар бўйича энг яхшилар аниқланиб уларга ҳам махсус совғалар топширилди. Ўзбекистон чемпионатида Наманган вилояти терма жамоаси шарафини ҳимоя қилган тарбияланувчиларимидан Диёр Баҳромжонов “Энг яхши ҳужумчи”, Фирдавс Умаралиев эса “энг яхши ёш футболчи” деб топилишди.