"Насаф" Туркиядаги сўнгги назорат ўйинида дуранг қайд этди

Рўзиқул Бердиев бошчилигидаги "Насаф" жамоаси Молдова чемпионатининг 5-ўринда кетаётган "Тирасполь" билан ўйинда дуранг қайд этишди. Учрашувда ҳар иккала жамоа рақиб дарвозасига тўп кирита олмади ва натижада ушбу беллашувда ғолиб номи аниқланмай қолди.

Ушбу ўйин "аждарлар"нинг Туркияда ташкил этилган йиғин доирасидаги сўнгги учрашуви бўлди. Шу билан Рўзиқул Бердиев бошчилигидаги жамоа Анталиядаги ўқув-йиғин машғулотларини якунлади.

Анталияда қаршиликлар жами еттита назорат ўйинларини ўтказишди.

Шуларнинг 3 тасида қаршиликлар ғалаба қозонган бўлса, 2 та дуранг ва яна шунча беллашувда мағлубиятга учрашди. "Насаф" - "Вион" (Словакия) 1:0, "Насаф" - "Динамо" (Грузия) 0:1, "Насаф" - "Корона" (Польша) 2:0, "Насаф" - "Гурник" (Польша) 1:0, "Насаф" - "Иличевец" (Украина) 0:1, "Насаф" - "Широқ" (Арманистон) 0:0, "Насаф" - "Тирасполь" (Молдова) 0:0.

Тўплар нисбати: 4:2. Голларни Артур Геворкян (2 та) ва Илҳом Шомуродов (2 та) киритишди. "Насаф" сафига янги келиб қўшилган украиналик легионер ҳужумчи Олександр Коблаш еттита ўйинда бирорта ҳам тўп кирита олмагани эътиборга молик. 

Эслатиб ўтамиз, Қаршининг "Насаф" жамоаси янги мавсумдаги ўзининг илк расмий ўйинини Қаршида 25 февраль куни ОЧЛ доирасида Эроннинг "Тракторсози" жамоасига қарши ўтказади.