“Насаф” ўз уйида мағлубиятга учрамаган ягона жамоа

Бу ғалаба қаршиликлар учун тарихий ғалабага айланди. Сабаби клуб ҳозирга қадар “қалдирғочлар”ни олий лига доирасида умуман мағлуб эта олмаганди. Шу кунга қадар бўлиб ўтган 13та ўйиннинг 8тасида “Бунёдкор” ғалаба қозонганди. 5та ўйинда дуранг қайд этилганди.

Бундан ташқари “Насаф” бу мавсумда ўз майдонида мағлуб бўлмаган ягона жамоага айланди. “Аждарлар” Қаршида кечган 13та ўйиндан 11тасида ғалабага эришди, 2та баҳсда меҳмон жамоа билан дуранг қайд этишди.

“Насаф” ўтган йилларда фақат бир марта бундай натижага эришганди. 2000 йилги мавсумда “аждарлар” ўз майдонларида бўлиб ўтган 19та ўйинни мағлубиятсиз ўтказишган (18 ғалаба ва 1 дуранг). Орадан 13 йил ўтиб Қарши клуби мавсумни мағлубиятсиз якунлай олди.