“Наполи” Италия Кубогини бешинчи маротаба қўлга киритди ФОТО

Таъкидлаш жоиз, ўйин белгиланган вақтдан 40 дақиқа кеч бошланди. Бунга стадион ташқарисида рўй берган оммавий тартибсизликлар сабаб бўлди.

Стадионга яқин жойда “Наполи”нинг тўрт нафар фанатига номаълум кимсалар томонидан ҳужум уюштирилган. Тўппончадан отилган ўқ бир тиффозининг кўкрак қафасига теккан ва зудлик билан госпиталга етказилган.

Стадионга йиғилган “Наполи” ишқибозлари бунга жавобан учрашувни ўтказмасликни талаб қилиб, майдонга петардаларни улоқтира бошлашди. Шу ернинг ўзида шошилинч йиғилиш ўтказилиб, унда ҳар икки клуб президентлари (Аурелио Де Лаурентис ва Андреа Делла Валле) иштирок этишди.

Шунингдек, Италия бош вазири Маттео Ренци, Италия Олимпия қўмитаси президенти Жованни Малаго ҳамда мамлакат футбол федерацияси раҳбари Жанкарло Абетелар ҳам ушбу шошилинч йиғилишда қатнашишди.

Шундан сўнг, “Наполи” сардори Марек Гамшик ўз жамоасининг ишқибозлари билан суҳбатлашиб, уларни тинчланишга ва оғирроқ бўлишга чақирди. Қирқ дақиқадан сўнг эса учрашув бошланди ва якунда “Наполи” флоренцияликларни 3:1 хисобида енгиб, ўз тарихида бешинчи бор Италия Кубогини қўлга киритди.

Шу пайтгача, неаполликлар мамлакат кубогига 1962, 1976, 1987 ҳамда 2012 йилларда эга чиқишганди.

Италия Кубоги. Финал

ФИОРЕНТИНА – НАПОЛИ - 1:3 (1:2, 0:1)

4 май, 00.45. “Стадио Олимпико”

Голлар: 0:1 – 11 Инсинье, 0:2 – 17 Инсинье, 1:2 – 28 Варгас, 1:3 – 90 Мертенс.

Фиорентина – Нето, Томович, Савич, Гонсало, Паскуаль (Фернандес, 56), Иличич, Аквилани (Матри, 83), Хоакин (Росси, 72), Борха Валеро, Варгас, Писарро.

Наполи – Рейна, Фернандес, Альбиоль, Энрике, Гулям, Гамшик (Мертенс, 64), Жоржиньо, Инлер, Кальехон, Инсинье (Бехрами, 81), Игуаин (Пандев, 71).

Огоҳлантиришлар: Борха Валеро (10), Альбиоль (36), Иличич (40), Томович (47), Инлер (50), Фернандес (65), Инсинье (78), Рейна (81).

Четлатиш: Инлер (79).