Мундиал олдидан. Жавоҳир Сидиқов: "Янги Зеландияга мослашиб бўлдик"

Ўзбекистон ёшлари илк баҳсини 1 июндан бошлаб ўтказади. Терма жамоамиз футболчиси Жавоҳир Сидиқов чемпионат олдидан сайтимизга фикрларини билдириб ўтди.

"Жамоанинг кайфияти жуда яхши. Янги Зеландия бизни жуда ҳам ажойиб кутиб олди. Бу ерда айни вақтда қиш мавсуми ва бироз совуқ. Умуман футболга мос об-ҳаво десак бўлади. Вақтга ва муҳитга мослашиб бўлдик" , - дейди Жавоҳир Сидиқов.

"Юртимизга ёруғ юз билан қайтиш учун максимал ўйинни кўрсатамиз. Ҳамма чемпинатга медал ютамиз деб келади. Бизда ҳам шу мақсад. Ўйлайманки термамизда бунга имконият етади. Рақибларни ўйини ҳақида ма`лумотларга эгамиз. Шунга қарамай бу жаҳон чемпионати ва ҳамма бор имкониятини кўрсатади".

"Ташкилотчилик ва тайёргарлик ҳақида энг яхши фикрларни билдириб муҳим. Шаҳар кичик ва жуда ҳам кўркам. Машғулот майдонларимиз ҳам барча қулайликларга эга. Камчилик борасида умуман фикр билдириб бўлмайди. Биринчи келган кунларимиз таомлари борасида тушунмовчиликлар бўлди лекин айни вақтда ҳаммаси ўз ўрнида. Меҳмонхонамиз стадиондан унчалик узоқда жойлашмаган экан. Майдон ҳолати билан ҳозирча танишишга муваффақ бўлганимиз йўқ".

"Мухлисларимиз қўллаб-қувватлаб туришини ҳис қиламиз. Энди фақат майдонга тушиш ва натижа кўрсатиш қолган".