Моуриньо МЮга борганидан кейин жамоада ўзгартирган 5 жиҳат

2013 йилдан кейин МЮ Премьер-лигада кучли учликка ҳам кира олмади. Ундан кейинги мураббийлар эса "Олд Траффорд"да ғалаба қозонишга ҳам қийналди.

Сер Алексдан кейин Девид Мойес ва Луи Ван Гал ҳам жамоани юқори даражага олиб чиқа олмади. Жамоа мухлислари ушбу икки мутахассиснинг ишларини ҳар доим ёмон хотиралар билан ёдга олишади. Жозе Моуриньо жамоа бошқарувини ўз қўлига олганидан кейин эса МЮ бир қатор совринларга чиқди.

У 2016 йилда "Манчестер Юнайтед"га борди. Жамоа у бошқарувидаги илк мавсумда 6-ўринни эгаллади, бироқ Европа лигаси ва Англия лига кубогини қўлга киритди.

Кейинги, яъни ушбу мавсум ҳам португалиялик ва унинг шогирдлари учун аъло даражада ўтмоқда. МЮ бир неча йиллардан кейин АПЛда кумуш медалларни қўлга киритишга яқин, Англия кубоги финалигача етиб борилди. Шу боисдан ҳам Жозе Моуриньони Сер Алексдан кейин МЮ учун идеал мураббий деб атасак бўлади.

5. ФЕРГИ ЭРАСИДАН КЕЙИНГИ ЭНГ ЯХШИ ПОҒОНА

2013/14 йилги мавсумда Девид Мойес ишлаган йили МЮ АПЛнинг 7-поғонасини қўлга киритганди. Унинг жамоаси 12 учрашувда мағлуб бўлди.

Луи ван Гал жамоасининг ҳам ишлари юришмади. Жамоанинг ўйин сифати ҳам мукаммал даражада эмас, етакчилар билан баҳсларда "иблислар" иродасиз ўйин кўрсатарди. Унинг қўл остидаги жамоа 4 ва 5-поғонани қўлга киритди.

Жозе давридаги илк мавсумда 6-ўрин эгалланган бўлса-да, "Юнайтед"да ўсиш кўзга ташланди. Барқарор ўйин кўрсатилмаган бўлса-да, муҳим натижалар қўлга киритилди. Энди эса Ферги эрасидан кейин Жозе АПЛдаги энг яхши натижани қайд этмоқда.

Ҳали мавсум якунланмаган, натижа бундан-да яхшилай олинади. МЮнинг бунга кучи етади.

4. БУ МАВСУМДАГИ ҚЎЛГА КИРИТИЛГАН ОЧКОЛАР

2013 йилдан кейин "қизил иблислар" илк маротаба 70дан кўп очко олишди. Ўтган йилларда МЮ 64, 70 ва 66 очко қўлга киритганди.

Моуриньо "Олд Траффорд"даги илк мавсумини эса 69 очко билан тугатди.

Айни дамда "Юнайтед" ҳисобида 74 очко бор. Ҳали мавсум якунланмади ва жамоа камида 80 очко тўплаш имкониятига эга. Агарда жамоа бундан кейин ҳам яхши натижаларни қайд эта олса, Моуриньо МЮда узоқроқ вақт қолади. Португалиялик мураббийнинг ўзи эса кейинги бир неча мавсумларни шу ерда ўтказмоқчи.

3. КАМБЭКЛАР

Сер Алекс кетганидан кейин ҳам МЮ камбэклар қила олишини кўрсатмоқда. Ўтган мавсумда "Мидлсбро" жамоаси билан учрашувда "Олд Траффорд"да 0:1 ҳисобида ютқазаётган жамоа асосий вақтнинг охирги 5 дақиқалигида икки бора гол киритди.

Бу мавсумда эса "Бёрнли" (2:2), "Челси" (2:1), "Манчестер Сити" (3:2), "Тоттенхэм" (2:1) каби жамоалар билан учрашувларда ҳисобда ортда қолаётган ҳолда мағлубиятдан қутулиб қолди. Жамоа ўша учрашувларда ўзини қўлга ола билди. Футболчилар мураббийнинг кўрсатмаларини бажара олди.

Моуриньо яхши жамоани йиға олган. У ўз қарорлари билан футболчиларни бошқаришни уддаламоқда. Шу боисдан майли қандай услубда, қай тариқа бўлса ҳам у ўзига керакли натижани қўлга киритмоқда.

2. УРИЛГАН ВА ЎТКАЗИБ ЮБОРИЛГАН ГОЛЛАР СОНИ

Жозе Моуриньо бу мавсумда етакчи жамоаларга қарши учрашувларда ҳимоявий услубни танлаётгани боис, танқидга учрамоқда. У "Реал", "Порту", "Интер" ва "Челси"да шу тарзда ишламаганди. Бироқ унинг тактикаси ўйинга эффектив ҳимояни тақдим этмоқда ва жамоа кам гол ўтказмоқда.

"Манчестер Юнайтед" сўнгги тўрт йилги мавсумда энг кўп голни киритди - 65 гол. Бундан олдинги мавсумларда эса жамоа 64, 62, 49 ва 54 гол киритганди. Бу борадаги натижада ҳам ўсиш бор.

Шунингдек, ҳимоядаги ишлар ҳам анчагина яхши. Жамоа уч мавсум олдин 35 гол ўтказиб юборганди. Ўтган мавсумда эса бу натижа 29 голга тенг бўлганди. Бу мавсумда жамоа ҳозирча 26 гол қўйиб юборди. Аслида бунга асосий сабабчи - Давид Де Хеа. У жуда кўп марта жамоани голлардан сақлаб қолишни уддалади. Муҳими натижада ўз ҳиссасини қўшмоқда.

1. ТОП-ЖАМОАЛАР УСТИДАН ҚОЗОНИЛАЁТГАН ҒАЛАБАЛАР

Сўнгги йилларда "Юнайтед" АПЛнинг топ-6 жамоаси билан учрашувларда ғалабага эришиш борасида яққол етакчи бўлмаган.

Жозе Моуриньо жамоа бошқарувини ўз қўлига олганидан кейин "Юнайтед" хоҳ ўз майдонида ёки сафарда бўлмасин "Ливерпуль", "Манчестер Сити", "Челси", "Арсенал", "Тоттенхэм" каби клубларни мағлуб этишни уддаламоқда. Жамоа голлар урмоқда, учрашувларда тўғри тактика билан ўйнамоқда.

Алексис ва Лукакунинг трансферидан кейин жамоа ҳужумида ранг-баранглик кўзга ташланмоқда. Улар кейинги мавсумда "Манчестер Юнайтед"нинг ўйинини янада кучайтира олиши аниқ.

Миржалол Норматов таржимаси