Москва кундалиги, 6-кун: Майдонда ўзбекистонликлар!

Бу премьер-лигадаги кетма-кет учинчи ўйинимиз бўлди. Ҳамроҳим Фахриддин Исамуҳамедов ва мен учун бу катта мактаб вазифасини ўтаб бериши аниқ. Ўзимизда у қилиш керак, бу қилиш керак деган қуруқ гапларни эшитгандан бир марта кўрган яхши. Мен худди шу ишни Комилжон Мирзабоевга маслаҳат берган бўлардим. Маркетинг жиҳатдан ҳам бу “Нефтчи” учун кони фойда.



Москвада футбол академиялари ўртасидаги рақобат жуда ошиб кетган. Аввалига бу ерда спорт турлари бир-бири билан рақобат қилади. Бу борада футболнинг асосий рақиби хоккей. Кейин баскетбол, волейбол, гандбол ва енгил атлетика. Болаларни жуда ҳам ёшлик чоғидан футболга оғдира олган клублар кейин ўзаро рақобатни бошлайдилар. Москва аҳолиси учун танлаш имконияти катта. Шу боис клуб ва спорт мактаблари яхши истеъдодларга эга бўлиш учун ўз моддий техника базасини доимий равишда янгилаб боради. Рақобатдан ютишни мақсад қилган “Локомотив” Россияда биринчилардан бўлиб академиясига 4 ёшга тўлган ёш болакайлар учун қабул эълон қилди.

Москвага келиб ўқувчиларимиз билан кўришмасак бўлмасди. ФИОдан кўра, исмлари билан айтсам барчангизга таниш бўлса керак: “Сегодня в блогах”, “ZOHID”, “Asror Aliqulov” ва “Nodirbek”лар билан тушлик қилдик. Кейин эса биргаликда стадион томон йўл олдик.



Шундан сўнг ҳамроҳим Фахриддин Исамуҳамедов медиа трибунага, мен эса ўз жойимга йўл олдим. “Спартак”нинг мухлислари анча кўпроқ экан. Ўз майдонида ўйнаши ва етакчилар қаторида бораётганига қарамай, “Локомотив” мухлислари анча кам эди. 20-сектор оилавий бўлиб, у ерда фарзандлари билан ташриф буюрган ота-оналарни кўришингиз мумкин бўлади. “Спартак” ўйини “биз сўкишга қаршимиз” шиори остида бўлиб ўтган эди. ЦСКА ҳам одоб доирасидан чиқмади, аммо “Локомотив”.... ТИ-ТУ-ТИ-ТУТТТТТ.... Ўйиннинг бошидан охиригача айтилмаган гаплар қолмади. “Локомотив”нинг собиқ футболчиси Ешенкони нималар деб аташмади.

Учрашув сухандони аввалига “Анжи” футболчиларини таништира бошлади. Бир бошдан санаб келинаётган футболчиларга “Локомотив” мухлислари чунонам бақирдики, қўллари билан нималарни кўрсатмадилар дейсиз. Лекин мен учун қизиқ туюлгани, ОДИЛ АҲМЕДОВ номи эълон қилинганда қарсаклар чалинди. Балки “Локомотив”  сафида Ўзбекистон терма жамоасининг аъзоси тўп тепаётганлиги сабаб бўлгандир, ёки келаси мавсум уни қўлга киритишни истаяптилар.



ОАВ учун бу ўйин тўлиқлигича Денисовга аталди. Учрашув дастурининг бош муқовасида Денисовнинг сурати жой олган ва унинг катта интервьюси чоп этилган. Стадион таблосида унинг “Локомотив” сафидаги бир қатор вазиятлари ролик сифатида берилди. Футболчимиз “Локомотив”ни ишончига тўлалигача кириб олгани бизни қувонтирмай қолмади.
Ўйинга тўлиқ тўхталмайман. Кўрганим “Анжи” собиқ футболчиси Мубарак Буссуфа меҳмон футболчиларининг атайин жиғига тегиши. Айнан у билан тўқнашувдан кейин Одил сариқ карточка олди. Кейинги вазиятларда Бусуффа “Анжи”нинг қолган ҳимоячиларининг ҳам асабига ўйнади. Бир сафар Аҳмедов корпус билан уни майдон ташқарисига чиқариб юборишга ҳам муваффақ бўлди, шундан кейин қайтиб ҳамюртимизнинг одига келмади. Шунга айтсалар керак, “ўзингдан чиққан балога, қайга борасан давога”.
Ўйин натижасидан кўпроқ “Анжи” манфаатдор бўлди. “Локомотив” эса “Зенит”ни ўтказиб юборди.
Стадиондан чиқиб кетаверишда бизни бир нечта ҳамюртларимиз қарши олдилар.

-   Салом, сиз Нарзулламисиз? (ҳамроҳимга қараб)
-   Йўқ.

-   Сиз-чи? (менга қараб)
-   Нодир...

-   Эй акалар, яхшимисизлар, мен сизларни кундалигингиз тагига “коммент” қолдиргандим. Менга қўнғироқ қилишингизни сўраб. Буни қаранг, барибир учрашиш насиб этган экан. Мен сизни суратга оласиз деб ўйламагандим. ВИП ложада ўтирсангиз керак дегандим-да. Биз билан чой ичасиз, кетдик.



Шу тариқа қўярда қўймай, андижонлик юзерларимиз, Аброрбек ва Сардорбек билан билан ўзбек миллий таомларига, ўзимизнинг “Нексия”да йўлга чиқдик. Агар йигитлар бугун ЦСКА манежини гаплаша олсалар, 16 апрель куни бизни ўқувчилар билан ўртоқлик учрашуви кутиб турибди. Эълонни сайтда берамиз.


Нодирхўжа Юлдашев.