Миржалол Қосимов: "Якуний паллада оқсаяпмиз"

"Фарруҳ Сайфиевни илк бор чап қанот ҳимоясида ўйнатиб кўрдик. Баъзи вазиятларда учта ҳимоячи бўлиб ўйнадик. Менимча Сайфиев яхши ҳаракат қилди. Бугун ўйинимиз ёмон чиққани йўқ, тўп назорати бизда бўлди. Лекин имкониятлардан фойдаланишда оқсаяпмиз. Ҳужум чизиғи мени хавотирга солмоқда", - деб гап бошлади Қосимов.

- Бугун Фарруҳ Сайфиевни чап қанот ҳимоясида синашдан мақсад кутилмаган жароҳат бўлиб қолса уларга тайёр туриш учунми?
- Буни анчадан бери ўйлаб юрган эдик. Мана бугун имконият бўлди ва Фарруҳни чап қанотда синаб кўрдим.

- Акбар Тўраевнинг майдонга тушгани учта ўйинда учта дарвозабонга имкон бериш учун қилиндими?
- Албатта, тўғри таъкидладингиз. Ўртоқлик ўйинларида барча посбонларимизни текшириб оламиз.

- Марказда ўйинимиз яхши чиқмоқда, лекин ҳужумда бундай деб бўлмайди...
- Мен ҳам шуни айтдимда. Якуний паллада биз яхши ҳаракат қила олмаяпмиз. Бундан ташқари об-ҳавонинг ҳам таъсири бўлгани турган гап.

- Бугун Баҳрайн ўз ўйинини кўрсата олмадими ёки биз бунга йўл қўймадикми?
- Ўртоқлик ўйини бўлгани учун ҳам бироз сустроқ ўйнашди. Бу руҳият билан боғлиқ. Бундай баҳсларда ҳеч ким 100 фоиз кучи билан ўйнамайди.

- Иккинчи бўлимда асосий ўйинчиларга дам берганингиз сабаби уларни БАА билан баҳсга асрашмиди?
- Асосий сабаби об-ҳавонинг иссиқлиги бўлди. Бундан ташқари БАА билан ўйиндан олдин қолган ўйинчиларга ҳам имкон беришни кўзлагандим.

- Бугун ҳакамларга биз томондан эътирозлар кўп бўлди. Элликка-эллик вазиятларда рақиб фойдасига қарор чиқарилди.
- Менимча терма жамоалар ўртасидаги ўйинларда юқорироқ савиядаги ҳакамлар ишлаши керак. Оддий вазиятларда ҳам бизга қарши қарорлар қабул қилинди.

Нодирхўжа Юлдашев
Дубай