Миржалол Қосимов: "Иккита тезкор гол ишимизни осонлаштирди"

“Ўйиннинг бошида қийналдик, “Навбаҳор” бизга қарши яхши тайёрлангани билинди”, - деб гап бошлади Миржалол Қосимов.

“Рақиб қарши ҳужумлар ташкил этди, зарбалар берди. Иккита голни қисқа вақтда ура олганимиз бизга фойда берди. Наманганликлар ҳужумга ўтишга мажбур бўлишди ва биз олдинда юзага келган бўш зоналардан фойдаланишга уриндик. “Шўртан”га қарши ўйиндан сўнг таркибда ўзгаришлар қилдим. Ғузорда Пишурни ўйини яхши чиқмаганди, Жасур Ҳасановни кубок финалига асраш учун захирада қолдиргандик. Майдонга тушганлардан Рашидов ўзини яхши кўрсатди, аммо битта ўйин ҳеч нарсани англатмайди, кейинги ўйинларда ҳам шундай савияда ўйнай олса бу унинг ютуғи бўлади”.

“Ўзбекистон кубоги финалидаги рақибимиз “Насаф” кучли жамоа. Охирги ўйинларда очко йўқотган бўлса ҳам барибир кучли жамоа ҳисобланади. Финал бу финал, ўйин кескин ва курашларга бой бўлади деб ўйлайман”.